Rusia mbrojti Sirinë në Këshillin e Sigurimit të OKB-së për herë të tetë gjatë konfliktit gjashtëvjeçar në këtë vend, duke shkaktuar tronditje dhe zemërim në diplomacinë ndëkombëtare. Moska vendosi veton për draft-rezolutën e Këshillit të Sigurimit që do të kishte dënuar sulmin me armë kimike të javës së kaluar në Siri dhe që kërkonte bashkëpunimin e Damaskut me hetuesit.
Rezoluta ishte paraqitur nga Shtetet e Bashkuara, Britania e Madhe dhe Franca, të cilat reaguan me zemërim ndaj vendimit të Rusisë.
Kjo është hera e tetë që Moska mbron aleatin e saj të vjetër në Këshill. Sulmi me armë kimike në zonën e kontrolluar nga kryengritësit, Khan Sheikhun më 4 prill vrau më shumë se 80 njerëz.
Aleatët perëndimorë fajësuan qeverinë siriane të presidentit Bashar al Assad dhe presidenti amerikan Donald Trump urdhëroi sulm me raketa ndaj një baze të forcave ajrore siriane në përgjigje të përdorimit të armëve kimike. Qeveria siriane sipas rezolutës duhet të ishte detyruar të jepte informacion ushtarak, përfshirë regjistrat e fluturimeve, nga dita e sulmit dhe të mundësonte akses në bazën ushtarake prej nga dyshohet se janë ngritur avionët.
Kina, një nga pesë anëtarët e përhershëm të Këshillit të Sigurimit që ka pushtetin e vetos, abstenoi në votim, sikundër bënë edhe Etiopia dhe Kazakistani. Dhjetë vende të tjera votuan për rezolutën, ndërsa Bolivia u bashkua me Rusinë duke votuar kundër.
Ambasadorja amerikane në Kombet e Bashkuara, Nikki Haley dënoi veprimin rus: “Po e izoloni veten nga komuniteti ndërkombëtar çdo herë që avionët e Assad-it hedhin bomba të tjera mbi civilët dhe çdo herë që Assad përpiqet të vdesë nga uria një tjetër komunitet”, tha ajo.
Sulmi ndëshkues amerikan mbi bazën ajrore Shayrat në Siri e ka zemëruar Rusinë. Në Uashington, në një konferencë të përbashkët me Sekretarin e Përgjithshëm të NATO-s, presidenti Trump u pyet nëse forcat siriane mund ta kenë ndërmarrë sulmin me armë kimike pa dijeninë e Rusisë.
“Mendoj se ka gjasa të jetë e mundshme. Unë mendoj se ka gjasa të jetë e pamundur”, tha ai. “Do të më pëlqente të mendoja se ata nuk e dinin, por me siguri ata e kanë ditur. Ata ishin atje”.
Sekretari amerikan i Shtetit, Rex Tillerson u bëri jehonë këtyre komenteve duke thënë se lidhjet me Rusinë ishin në një pikë të ulët dhe duhet të përmirësohen. Pas dy orë bisedimesh me presidentin Putin dhe Ministrin e Jashtëm Lavrov, ai tha se “dy fuqitë e mëdha bërthamore nuk mund të kenë marrëdhënie të tilla.
Pas votës në OKB, sekretari i Jashtëm britanik, Boris Johnson tha se Rusia ishte “në anën e gabuar të argumentit”, ndërsa presidenti francez, Francois Hollande tha se Rusia mban një përgjegjësi të rëndë që vazhdon të mbrojë Assad-in dhe që bllokon përgjigjen ndërkombëtare ndaj tij.
Rusia, nga ana e saj, kërkon hetim të pavarur ndërkombëtar duke vënë në dyshim faktin sesi fuqitë perëndimore kanë caktuar përgjegjësinë kaq shpejt për atë që ndodhi.
Përgatiti: Juli Prifti -/tesheshi.com/
