Me fotot rrëqethëse në dorë të viktimave të sulmit kimik në provincën Idlib të Sirisë dy ditë më parë, ambasadorja amerikane në OKB, Nikki Haley, ka deklaruar se, “Kur Kombet e Bashkuara dështojnë në mënyrë të vazhdueshme në detyrën për të vepruar kolektivisht, ka momente në jetën e shteteve që jemi të shtrënguar të ndërmarrim veprimin tonë.”
Paralajmërimi u bë në një takim të jashtëzakonshëm të Këshillit të Sigurimit të OKB-së, të thirrur për të diskutuar mbi sulmin vdekjeprurës kimik në Han Shejhun dhe për të votuar një rezolutë e cila kërkonte një hetim tërësor të ngjarjes, për çka akuzohet regjimi sirian.
Një votim që nuk u krye për shkak të kundërshtisë ruse. “Kategorikisht i papranueshëm” u cilësua nga përfaqësuesi i Rusisë në OKB teksti i projektrezolutës të sjellë nga SHBA-ja, Franca dhe Britania.
“Nëse Rusia ka ndikim në Siri, që pretendon se e ka, ne duam t’i shohim ata ta përdorin atë. Duam t’i shohim t’u japin fund këtyre akteve të tmerrshme,” do të deklaronte Nikki Haley në fjalën e saj.
Donald Trump do të pohonte po ashtu gjatë aktiviteteve të tij se sulmi kimik në Siri kishte patur goxha ndikim mbi të.
“Do t’u them se sulmi mbi fëmijët dje kishte një ndikim të madh mbi mua. Qëndrimi im ndaj Sirisë dhe Assad-it ka ndryshuar shumë.”
Observatori Sirian për të Drejtat e Njeriut ka raportuar për së paku 86 viktima, mes të cilëve 30 fëmijë, nga sulmi kimik në Idlib, veç qindra të lënduarve. /tesheshi.com/
