Një sulm kamikaz në urgjencën e një spitali në Kuetta të Pakistanit ka qenë fatal për më së paku 70 persona, të cilët kanë humbur jetën, përpos shumë të tjerëve të plagosur.
Sulmi mendohet të ketë patur për objektiv një grup juristësh, që gjendeshin në spital për të shoqëruar trupin e një kolegu të vrarë.
Media pakistaneze flet dhe për gazetarë mes të vdekurve, me dy kameramanë më e pakta të vrarë.
“Shpërthimi ndodhi pasi një numër juristësh dhe disa gazetarë qenë mbledhur në spital mbas vdekjes së Bilal Anwar Kasi-ut, kryetarit të Shoqatës së Avokatëve të Beluçistanit, në një incident me të shtëna më herët këtë mëngjes,” deklaroi ministri i Brendshëm i Beluçistanit, Sarfraz Bugti.
Kryeministri pakistanez, Nawaz Sharif, e dënoi fuqimisht shpërthimin në Kuetta, duke shprehur pikëllimin e thellë për humbjen e jetëve.
“Askush nuk do të lejohet ta prishë paqen në provincë, të rikthyer falë sakrificave të panumërta nga forcat e sigurisë, nga policia e nga populli i Beluçistanit,” tha ai.
Përgjegjësinë për sulmin e mori fraksioni taliban i Pakistanit. /tesheshi.com/
