Njeriu, i cili besohet të ketë sulmuar dhe plagosur dy persona me thikë të premten në Paris, po bashkëpunon me policinë, e cila zbuloi se shënjestra e tij ishte gazeta satirike Charlie Hebdo, i tha një burim policie për Reuters.
Sulmi ndodhi përpara ish-zyrës së javores kontraverse franceze, ku dymbëdhjetë punonjës të saj u vranë në 2015 për botimin e karikaturave të Profetit Muhamed.
Sulmi i ri përkoi me fillimin e gjykimit të katërmbëdhjetë pjesëmarrësve në sulmin e vitit 2015.
Një burim gjyqësor zbuloi se paraburgimi i të dyshuarit u zgjat të shtunën në mëngjes. Një i dyshuar që ishte bashkëpunëtori i tij në sulm u la i lirë të shtunën, dhe një tjetër individ afër sulmuesit u arrestua, ndoshta ish-shoku i tij i dhomës në një hotel në veri të Parisit.
Shtatë vetë u arrestuan për sulmin të shtunën pasdite.
Policia kapi sulmuesin pranë shtëpisë së operës, 500 metra larg vendit të krimit.
I dyshuari është një pakistanez i cili arriti në Francë tre vjet më parë si një i mitur i pashoqëruar, tha ministri i Brendshëm Gerald Darmanin.
Vendndodhja sekrete e Charlie Hebdo
Një tjetër i dyshuar u arrestua menjëherë pas sulmit dhe hetuesit ende po përpiqen të zbulojnë se cila është lidhja e tij me sulmuesin. Ai u la i lirë nga paraburgimi.
Charlie Hebdo u largua nga ato zyra pas sulmit në 2015 dhe tani është në një vend të fshehtë. Ndërtesa aktualisht përdoret nga një kompani prodhimi.
Dy të plagosurit, një burrë dhe një grua, dolën në rrugë për të ndezur një cigare.
Hetuesit thanë pas sulmit të vitit 2015 se ‘sulmuesit donin të hakmerreshin për botimin e karikaturave të Muhamedit’ dhe Charlie Hebdo i ribotoi ato përpara fillimit të gjyqit këtë vit.
Al-Kaeda, e cila mori përgjegjësinë për sulmet e vitit 2015, ka kërcënuar se do të reagojë përsëri nëse karikaturat ridalin në publik. /tesheshi.com/
