Nga Blendi Gashi
Sulmi ndaj konsullatës turke në Prizren ka shqetësuar jo pak politikën kosovare dhe jo vetëm.
Ndonëse pushteti në Kosovë reagoi ashpër duke dënuar rastin në fjalë, ambasada turke në Kosovë përmes ambasadores, Kivilcim Kiliç, është deklaruar se sulmi i ndërmarr nga individë të caktuar me qëllim të prishen marrdhëniet e mira mes Kosovës dhe Turqisë.
Ndaj këtij sulmi reaguan përfaqësues të shoqërisë civile dhe mediave duke e cilësuar veprim të papranueshëm.
Por shtrohet pyetja: a mund të përkeqësojë ky sulm marrëdhëniet e shkëlqyera që ekzistojnë mes Kosovës dhe Turqisë?
Pjesëtarë të komunitetit turk që jetojnë dhe punojnë në institucione të Kosovës sulmin e qujanë të izoluar dhe në asnjë mënyrë sipas tyre nuk mund të ndikojë në përkeqësimin e marrdhënieve mes dy shteteve.
Ministri i Administratës Publike në qeverinë e Kosovës, Mahir Yagcilar, pjesëtar i komunitetit turk, ka thënë se akte të tilla mund të ndikojnë në marrëdhëniet në mes dy shteteve.
“Këto raste nëse nuk ndalohen në të ardhmen mund të krijojnë probleme të tjera”, ka thënë Yagcilar, për mediat kosovare.
Ai më tej ka shtuar se Kosova është shtet i të gjithëve përfshirë këtu edhe pakicat që i përbëjnë edhe komuniteti turk.
“Kosova është shtet i të gjithëve. Bashkë e ndërtuam këtë shtet dhe dëshirojmë që dhe ma tutje ta zhvillojmë. Ne si shqiptarë e dënojmë këtë akt sepse është sulm ndaj etnitetit. Nga aspekti tjetër ky sulm mund të krijoj ose përkeqësoj marrëdhëniet e Kosovës me Republikën e Turqisë”, ka thënë Yagcilar.
“Sulmi individual, miqësia Kosovë-Turqi do të vazhdojë”
Ish-deputeti i komunitetit turk në Kuvendin e Kosovës, Enis Kervan, thotë se sulmi ndaj konsullatës turke nuk mund të prish marrëdhëniet mes dy shteteve pasi ato janë ndërtuar ndër vite dhe do të vazhdojnë të jenë marrdhënie të shëndosha edhe në vazhdim.
“Nuk e kemi prit si komunitet turk këtë sulm. Shpresoj që nuk do të përsëritet më dhe organet e drejtësisë të bëjnë punën e tyre. Ky sulm është individual i kryer nga disa persona dhe assesi nuk mund të prish marrëdhëniet mes Kosovës dhe Turqisë. Ky sulm assesi nuk përfaqëson komunitetin shumicë shqiptarë të Kosovës. Miqësia mes dy vendeve do të vazhdon edhe në të ardhmen”, thotë ish-deputeti turk Kervan për tesheshi.com.
“Raportet ndërvëllazërore Kosovë-Turqi, s’mund t’i prish as molotovi as bombat”
Deputeti i pavarur, njëherit kryetar i partisë FJALA, Gëzim Kelmendi, sulmin ndaj konsullatës turke thotë se është kryer nga disa kriminel dhe terrorist që kanë dashur të përçojnë disa mesazhe.
“Dikujt po i pengojnë raportet ndërvëllazërore Kosovë-Turqi.
Dikush po tenton të i rrënon raportet ndërvëllazërore Kosovë-Turqi.
Në mesin tonë ka ende Esat Pashë Toptana, që rrënuan shqiptarët në veçanti dhe perandorinë osmane në përgjithësi.
Në mesin tonë ka ende pasardhës të komunizmit që për 100 vite u munduan ta rrënojnë vëllazërinë shqiptaro-turke.
Injoranca (padituria) është ende prezente në vendin tonë”, thotë Kelmendi për tesheshi.com.
Por ai shprehet se përkundër sulmeve të tilla sulmet ndërvëllazërore Kosovë-Turqi janë raporte me trashëgimi 600-vjeçare, dhe të gjithë ata që janë pasardhës të komunizmitduhet ta kuptojnë, se as me koktej molotovi dhe as me bombë atomike (nëse e huazoni nga vëlllezërit e juaj komunist në lindjen e largët), nuk do të arrin ta rrënojnë vëllazërinë shqiptaro-turke.
Ish-deputeti i Partisë së Drejtësisë, Amir Ahmeti, thotë se një akt i tillë është bërë nga huliganë dhe nuk duhet të kaloj pa dënimin e merituar nga gjyqësia kosovare, duke thënë se sulmi në fjalë nuk përkon me traditën dhe kulturën shqiptaretonë.
“Nuk besoj se një akt i lig e qyqarë, që po shpresoj është i izoluar, të ndikoj në prishjen e raporteve mes dy vendeve tona. Raportet mes Kosovës e Turqisë nuk janë të ndërtuara vetëm prej shpalljes së pavarësisë, por janë shekullore. Është shumë pozitive reagimi i shpejt edhe i Policisë së Kosovës dhe Prokurorisë te cilët shumë shpejt i janë ndaluar keqbërësit dhe tani pritet edhe verdikti gjyqësor”, thotë ish deputeti Ahmeti, për tesheshi.com.
BIK: Sulmi akt qyqar dhe i izoluar
Sulmin e ka dënuar edhe Kryesia e Bashkësisë Islame të Kosovës duke e cilësuar si veprim të papranueshëm, ndërsa thotë se atakimi i misionit diplomatik të një vendi mik siç është Turqia, është veprim që për qëllim ka cenimin e marrëdhënieve dhe raporteve vëllazërore që kanë dy vendet e dy popujt.
“Aktet dhe veprimet e tilla qyqare do të mbesin të izoluara dhe të dënuara, e si të tilla nuk do të arrijnë që të prekin marrëdhënia dhe raportet tona të shkëlqyera e vëllazërore. Te Turqia ne shohim një aleate, mbështetëse e përkrahëse të kauzës sonë shtetërore”, thotë BIK.
Lidhur me këtë sulm, policia e Kosovës ka arrestuar pesë persona. Në vendin e ngjarjes si dëshmi janë sekuestruar: një shishe qelqi e tymosur e pa thyer, ngjyrë kafeje si dhe disa copëza qelqi të thyera në vend të ngjarjes. /tesheshi.com/
