Pas Uashintonit e Berlinit, është dhe Brukseli që ka dënuar dhunën e ushtruar kundër KZAZ-ve, në ato qytete ku bashkitë drejtohen nga PD apo LSI.
Siç është parë deri më sot, mësyrja ndaj tyre nga zyrtarë e militantë të dy forcave, është bërë duke patur “flamur” ç’dekretin e Metës ndaj zgjedhjeve, ndaj të cilit edhe ndërkombëtarët kanë heshtur duke lënë të nënkuptuar se nuk pajtohen me të.
“Ne jemi të shqetësuar nga episodet e fundit të dhunës që kanë ndodhur në disa rajone të vendit. Asnjë akt i dhunshëm apo formë e nxitjes për dhunë nuk mund të tolerohen në asnjë rrethanë”, thuhet në një deklaratë të Zyrës së BE-së në Tiranë, ku ndër të tjera kërkohet dhe një dialogim mes aktorëve politikë.
“Ne vazhdojmë t’i bëjmë thirrje të gjitha palëve për të treguar vullnet të fortë politik dhe për t’u angazhuar urgjentisht në një dialog konstruktiv për të kapërcyer situatën politike aktuale, si dhe për të mbështetur dhe konsoliduar progresin e bërë nga Shqipëria në procesin e reformave”, thuhet nga Brukseli. /tesheshi.com/
