Një valë incidentesh me sfond racist ka pasuar në Britani që prej rezultatit të referendumit për të dalë nga BE-ja.
Në qendër të sulmeve janë të huajt e pakicat, që janë frikësuar e u është kërkuar të kthehen në shtëpitë e tyre.
Këshilli Musliman i Britanisë ka mbledhur raporte të medias sociale për më shumë se 100 incidente raciste që nga e enjtja e shkuar.
Ambasada polake do të reagonte më herët, duke u shprehur si “e tronditur dhe thellësisht e shqetësuar” për sulmet mbi polakët dhe mbi qytetarët e tjerë lindorë që jetojnë në Angli.
Komisioneri i lartë i OKB-së për të drejtat e njeriut, Zeid Ra’ad al-Hussein, do të thoshte një ditë më parë se racizmi dhe ksenofobia janë të papranueshme në çdo rrethanë.
“I nxis autoritetet britanike të veprojnë për t’i ndaluar këto sulme ksenofobike dhe të garantojnë që të gjithë të dyshuarit për sulme raciste dhe kundër të huajve të jenë proceduar,” tha komisionieri i OKB-së.
“Të tërë ne nuk duhet të pranojmë t’i tolerojmë aktet diskriminuese në jetën tonë të përditshme,” ka shtuar ai.
Kryeministri britanik ka reaguar pas incidenteve, duke thënë se qeveria e tij nuk do ta tolerojë intolerancën. /tesheshi.com/
