Al Jazeera raporton për një seri sulmesh kamikaze në Homs, në qytetin e tretë më të madh të Sirisë. Një qytet nën kontrollin e qeverisë siriane, sulmet në të kanë patur si objektiv pikat ushtarake, duke vrarë më së paku 20 persona.
Mes të vrarëve ka qenë dhe shefi i shërbimit të fshehtë të ushtrisë, njeri i afërt dhe i besuar i Bashar Assad-it.
Televizioni shtetëror lajmëroi vrasjen e gjeneral Hassan Daabul-it, ndërsa guvernatori i provincës i tha Associated Press se kishte patur tre shpërthime, prej të cilëve ishin vrarë 20 persona dhe ishin plagosur shumë të tjerë.
Një zë tjetër informues për konfliktin sirian, Observatori Sirian për të Drejtat e Njeriut, flet për 42 të vrarë nga këto sulme.
“Kishte e pakta gjashtë mësymës, dhe ca prej tyre e hodhën veten në erë pranë godinave qendrore të shërbimit të fshehtë ushtarak dhe të sigurisë shtetërore,” tha për AFP-në drejtuesi i këtij organizmi, Rami Abdel Rahman.
Homsi është në duart e regjimit sirian që në 2014-n, kur kryengritësit u tërhoqën pas një armëpushimi të ndërmjetësuar nga OKB-ja. /tesheshi.com/
