Për zyrtarët e shërbimeve sekrete dhe policinë, sulmet e Brukselit janë një goditje e rëndë pas muajsh të tërë operacionesh antiterrorist, jo vetëm në Belgjikë, por edhe në të gjithë kontinentin. Franca ka shtrënguar masat e sigurisë në aeroporte dhe vende të tjera kanë bërë të njëjtën gjë, duke mbledhur më shpejtësi trupat e tyre të sigurisë.
Me dhjetëra policë të armatosur kanë ndërmarrë kontrolle rrugë më rrugë në Bruksel, me muaj të tërë, në përpjekje për të çmontuar një rrjet xhihadistësh që kishte hedhur rrënjë në kryeqytetin belg. Vendi ka qenë në nivel të lartë gatishmërie që pas sulmit në Parisit, më 13 Nëntor, ku ishin të përfshirë rreth 10 persona, disa prej të cilëve kamikazë. Të paktën pesë prej tyre vinin nga një lagje e Brukselit, Molenbeek, vetëm gjashtë stacione më tej nga Maelbeek, stacioni ku shpërtheu bomba së fundmi.
Por, duket se pavarësisht përpjekjeve për të siguruar kufijtë që kanë vënë në dyshim edhe marrëveshjen Shengen, së fundmi, e kjo për të mos lejuar kalimin e refugjatëve nga Lindja e Mesme, sulmet në zemër të Europës nuk kanë të ndalur. Kriza e refugjatëve, vëren në një artikull revista “Foreign Affairs”, dhe siguria e kufijve të Europës nuk është problemi i vërtetë. Ky problem qëndron në lagjet e margjinalizuara në kryeqytetet europiane ku qëndrojnë emigrantët, atje ku kanë hedhur rrënjë grupe të radikalizuara.
Një parrullë e bardhë e ngritur drejt qiellit: “Më vjen keq për Brukselin”. Është mesazhi i ngushëllimit që një refugjat i vogël ka dashur të përcjellë për viktimat e atentateve në kryeqytetin belg. Fëmija ndodhet në kampin e refugjatëve në Idomeni, në kufirin mes Greqisë dhe Maqedonisë.
Zyrtarët e kanë përqëndruar vëmendjen tek ata që kanë luftuar jashtë kufijve e mund të jenë ende nën instruksionet e ISIS me kthimin e tyre në shtëpi: disa nga agresorët e Parisit ishin kthyer nga trajnimet në Siri dhe kishin krijuar një çerdhe koplotiste në Paris, duke u lidhur me bazën në Molenbeek.
Por, në ditët e fundit, liderët e Bashkimit Europian paralajmëruan se numri i njerëzve që mund të jenë potencialisht të lidhur me terrorizmin duket shumë më i madh nga sa ishte vlerësuar më parë.
Ndërsa policia festoi arrestimin e terroristit më të kërkuar në Europë, Abdeslam të premten e kaluar, lehtësimi i tyre nuk zgjati shumë, për shkak se një rrjet mbështetësish e bashkëpunëtorësh që e kishin ndihmuar atë, dukshëm i madh, mbetet ende i paidentifikuar.
Përgatiti: Juli Prifti – /tesheshi.com/
