Turqia njoftoi se ushtria e këtij vendi interceptoi një avion ushtarak rus që kishte shkelur hapësirën ajrore turke ndërsa po fluturonte për një sulm ajror në Siri. Incidenti ka rritur tensionin disa ditë pas ndërhyrjes ushtarake të Rusisë në Siri.
Ministria turke e Punëve të Jashtme njoftoi shkeljen e hapësirës ajrore, duke saktësuar se avioni rus po fluturonte në jug të Hatay, një provincë kufitare mes Sirisë dhe Turqisë.
Ankaraja thirri ambasadorin e Rusisë në vend dhe protestoi me forcë për këtë shkelje.
Sipas njoftimit, “Turqia kërkoi të mos përsëritej incidenti dhe se në rast të një shkeljeje të re të hapësirës së saj ajrore, Rusia do të mbante përgjegjësinë e plotë për përshkallëzimin e mëtejshëm”.
Turqia gjithashtu dorëzoi një notë proteste pranë ministrit të JAshtëm rus, Sergei Lavrov, dhe tha se do të konsultohej me aleatët e NATO-s për pasojat e këtij incidenti.
Aleatët e Turqisë në NATO kanë reaguar menjëherë në mbështetje të saj. Ambasadori britanik në NATO, Richard Moore tha se aleatët qëndrojnë në krah të Turqisë.
Sulmet ajrore ruse në Siri nisën javën e kaluar në mbështetje të presidentit Bashar al Assad. Së pari, sulmet kishin në shënjestër pozicionet e kundërshtarëve të presidentit.
Turqia dhe presidenti Erdogan janë shprehur kundër qëndrimit të mëtejshëm të Assad në Siri, duke kërkuar largimin e tij si pjesë e zgjidhjes politike. /tesheshi.com/
