Së paku 47 civilë janë vrarë e mbi 100 të tjerë janë plagosur kur avionët rusë bombarduan një zonë banimi dhe një treg në provincën e Idlibit, në veriperëndim të Sirisë.
Bombarduesit rusë goditën banesa, tregje e një burg në kontroll të Frontit en-Nusra në qytetin e Maaret en-Numanit. Drejtuesi i Observatorit Sirian për të Drejtat e Njeriut, Rami Abdel Rahmani, deklaroi se të vdekurit përfshinin të burgosur dhe luftëtarë të en-Nusras, si dhe civilë që gjendeshin në treg.
Ndërkaq, koordinatori i Mbrojtjes Civile Siriane për Idlibin i tha Al-Jazeera-s se shumë nga të plagosurit janë në gjendje të rëndë, e bilanci i viktimave pritet të rritet.
“Vullnetarët tanë janë ende në zonën e vënë në shenjë nga sulmet ajrore. Ata po përpiqen t’i ndihmojnë të plagosurit dhe të prekurit nga sulmi,” shtoi ai.
Bombardimet ruse kanë nisur që prej fundit të shtatorit të vitit që sapo lamë pas, dhe me pretekstin e goditjes së objektivave të ISIS-it kanë bombarduar pareshtur kundërshtarët e regjimit të Esadit. /tesheshi.com/
