Shtëpia e Bardhë ka pranuar se që nga janari i 2009-tës e gjer në dhjetor të 2015-tës janë vrarë nga 64 gjer në 116 civilë nga sulmet ajrore amerikane apo nga avionët pa pilotë në zonat jashtë luftës.
Raporti i bërë publik të premten thotë se nga 20 janari i vitit 2009 e deri në 31 dhjetor të 2015-tës janë kryer 473 sulme nga SHBA-të, që kanë vrarë 2.581 luftëtarë e deri në 116 civilë.
Viktimat civile janë nga vende jo të njohura si fusha beteje, e nuk pasqyrojnë sulmet ajrore amerikane në zona me luftime aktive.
Por ky numër është shumë më i vogël nga ai që pretendohet nga grupet e të drejtave të njeriut. Byroja e Gazetarisë Investigative, me qendër në Londër, vlerëson se nga sulmet me avionë pa pilotë në Pakistan, në Jemen e në Somali, shifra e civilëve të vrarë që prej vitit 2002 sillet nga 492 në 1.100 viktima.
Sipas kësaj byroje, këto shifra janë nxjerrë nga gazetarët lokalë e të huaj, nga dokumente qeveritare e nga hulumtimet në terren.
Vetëm pak pas bërjes së njohur të raportit nga Shtëpia e Bardhë, Josh Begley, një redaktor i faqes publikuese The Intercept, ofroi një listë me 212 civilë të vrarë vetëm në Pakistan.
Presidenti Barack Obama ka nënshkruar një urdhër ekzekutiv që kërkon bërjen të njohur të viktimave civile për çdo vit, si një përpjekje për ta hequr mjegullën mbi operacionet ushtarake amerikane, e për ta bërë më transparente rezultatin e tyre. /tesheshi.com/
