Vijojnë në Turqi sulmet dhe shpërthimet me bomba. Një sulm i tillë, me një makinë-bombë, ka ndodhur sot pasdite në Dijarbakër, një provincë me popullsi kurde.
Gjashtë policë kanë vdekur, e 23 persona janë plagosur, kur një makinë-bombë ka shpërthyer pranë një automjeti ku gjendeshin forca speciale.
Shpërthimi ka ndodhur pranë stacionit kryesor të autobusëve, e pas tij janë dëgjuar dhe të shtëna armësh.
Ende askush nuk e ka marrë përgjegjësinë për sulmin.
Në zonë ka një numër të madh ambulancash, ndërsa numri i viktimave mund të rritet. Dijarbakëri është qyteti më i madh në juglindje të Turqisë, e është goditur nga vala e terrorit të PKK-së që në mesin e vitit të shkuar, kur mori fund dhe armëpushimi.
Ky shpërthim pason ato të Ankarasë në dy muajt e shkuar, një në shkurt e tjetri në mars, ku u vranë dhjetë njerëz e u plagosën qindra të tjerë, e atë të Stambollit, po gjatë këtij muaji, ku humbën jetën katër persona. /tesheshi.com/
