Kryesia e Bashkësisë Islame Kosovës, ka organizuar sesionin shkencor “Kur`ani te shqiptarët”, i cili po mbahet për nder të 30-vjetorit të përkthimit të Kur`anit në gjuhën shqipe.
Myftiu Naim Tërnava tha se tash e 30 vite më parë myslimanët shqiptarë e bënë pronë të tyre Kur`anin shqip.
Ndërsa, Ahmet Sadriu, tjetër zyrtar i lartë në BIK, tha se ndonëse edhe më herët kanë ekzistuar përpjekjet për t’a përkthyer Kur`anin, kjo ndodhi vetëm pas shpalljes së pavarësisë dhe konsolidimit të shtetit shqiptar, kur dhe interesimi për përkthimin e Kur`anit u bë edhe më i madh.
Ndërsa reis Sulejman Rexhepi, kreu i Bashkësisë Islame të Maqedonisë, u zgjerua më tej në fjalën e tij kur i quajti kohërat e sotme si të mbrapshta, duke thënë se edhe Islami po ballafaqohet me sfidat më të ndryshme. Por ai, në raport me Kur`anin kërkoi dhe diçka tjetër:
“Në kohën kur po akuzohet Islami, pikërisht sot ne me këtë sesion po dëshmojmë se Islami edhe mbrohet dhe përhapet me dituri dhe urti dhe jo me dhunë dhe me brutalitet. Mendoj se ndoshta është koha ku duhet t’i kthehemi një pune tjetër, sepse përkthimi siç e dini është problem me qenë autentik i fjalës së Allahut. Dhe mu për këtë duhet të bëhen përpjekje që të bëjmë edhe komentimin e Kur`anit, për të mos u lënë hapësirë njerëzve dashakeq, që t’i japin kahje tjetër librit të Zotit”, ka thënë ai.
/tesheshi.com/
