Sjellja e hareshme dhe e shpenguar e presidentes kroate Kolinda Grabar-Kitaroviç, përgjatë dhe pas finales së Kupës së Botës, ka shkaktuar një sërë reagimesh në media dhe në rrjetet sociale.
Disa kanë qenë pozitive e disa negative. E ndër ato ka veçuar ajo e gazetës austriake Kurier, e cila në një artikull të saj e quajti “Alkoholinda”.
Në artikulli shkruhej se se “disa dyshojnë në sinqeritetin dhe emocionet e saj”, dhe se “ajo nuk ka vepruar në përputhje me pozitën e lartë politike që ka”.
Por nga u nis kjo media austriake për ta quajtur Kolinda Grabar-Kitaroviçin si “Alkoholinda”? Nga tabloidët serbë! Këto të fundit, kanë përcjellë deri diku dhe “mllefin” nacional serb për suksesin kroat në Botëror.
Nëse ka një vend në rruzull që nuk do donte që Kroacia të shkonte aty ku shkoi, gjer në finale, është padyshim Serbia.
Një ditë më parë, në Paris, gjatë një konference për shtyp me presidentin Macron, homologu i tij serb Vuçiç u shpreh me tone të ashpra ndaj ngazëllimit kroat, me pretendimin se gjatë festës për suksesin në Botëror kishin kënduar himne ustashe. Me gjysëm zëri ai pohoi se vërtet e kishte pëlqyer lojën kroate, porse nuk mund te ishte tifoz i tyre. /tesheshi.com/
