Në Britaninë e Madhe është realizuar me sukses transplanti i parë i zemrës nga një kufomë. Deri më tani, një operacion i tillë ishte realizuar tek pacientët në gjendjen e vdekjes cerebrale, kur muskuli i zemrës ishte ende në funksion.
Kirurgët në spitalin Papworth në Cambridgeshire, kanë mundur të tregojnë se edhe organet e “fikura” mund të riaktivizohen. Ndërhyrja, e cila është realizuar me sukses, është bërë mbi një person të seksit mashkull, të moshës 60-vjeçare.
Operacioni ka ndodhur rreth një muaj më parë, por vetëm tani është bërë publik për mediat, ndërsa pacienti ka arritur të rikuperojë gjendjen e tij shëndetësore. Sipas mjekëve anglezë, ky operacion sjell një revolucion në shkencë, e cila do të ketë si pasojë shpëtimin e jetës së qindra personave.
Zemra e “fikur” është vënë në funksion nëpërmjet një pompe dhe është monitoruar për një orë funksionimi i saj. Më pas është realizuar transplanti i suksesshëm. /tesheshi.com/
