Organizata Botërore e Shëndetit (OBSH) tha se ka krijuar një organ të pavarur për të vlerësuar menaxhimin e pandemisë COVID-19.
Presidenti amerikan Donald Trump akuzoi OBSH se ishte një “kukull në duart e Kinës” dhe se organizata injoroi paralajmërimin e hershëm të Tajvanit për ashpërsinë e virusit të koronës, si dhe që ishte vonë në shpalljen e një pandemie.
Ish-Kryeministrja e Zelandës së Re Helen Clark, si dhe ish-Presidentja liberiane Ellen Johnson Sirleaf, kanë rënë dakord të kryesojnë një komision të pavarur dhe të zgjedhin anëtarët, tha Drejtori i Përgjithshëm i OBSH-së Tedros Adhanom Ghebreyesus.
“Nuk është një raport i zakonshëm. Ne po i qasemi shumë seriozisht,” tha ai, duke iu referuar raportit që do të paraqitet në mbledhjen vjetore të ministrave të Shëndetësisë.
Tedros kujtoi që 194 anëtarë të OBSH-së, përfshirë Shtetet e Bashkuara dhe Kinën, miratuan një rezolutë në mesin e majit mbi një vlerësim të pavarur të përgjigjes së agjencisë së KB ndaj pandemisë së re të virusit koronar.
Teksti u miratua me konsensus dhe parashikon fillimin sa më shpejt të jetë e mundur të një vlerësimi të paanshëm, të pavarur dhe të plotë të aksionit ndërkombëtar të filluar për shkak të pandemisë, me qëllim të përmirësimit të kapacitetit global për parandalimin, përgatitjen dhe reagimin ndaj pandemive.
Që nga shfaqja e koronavirusit të ri SARS-CoV-2 në fund të vitit të kaluar në Kinë, më shumë se 12 milion njerëz janë infektuar në botë deri më tani, dhe pothuajse 550,000 kanë vdekur. /tesheshi.com/
