Suedia dhe Finlanda mund të anëtarësohen në NATO që në vitin 2023, tha të dielën kryesekretari i kësaj organizate, duke kujtuar megjithatë se vendimi varet nga parlamenti turk dhe ai hungarez.
“Unë pres (që ata do të aderojnë në vitin 2023), por nuk mund të garantoj datën e saktë sepse është një vendim sovran i parlamentit turk dhe hungarez, të cilët ende nuk e kanë ratifikuar traktatin”, tha Jens Stoltenberg në një intervistë për AFP.
Prej majit, Hungaria dhe veçanërisht Turqia kanë bllokuar hyrjen e dy vendeve nordike në NATO.
“Ne patëm negociata, dhe ato ishin mjaft kërkuese, në maj të vitit të kaluar, kur Turqia, Finlanda dhe Suedia ranë dakord për një memorandum të përbashkët në të cilin përshkruanin se si mund të forconin bashkëpunimin, si në lidhje me eksportin e armëve ashtu edhe, për shembull, në luftën kundër terrorizmit”, tha Stoltenberg.
“Finlanda dhe Suedia e respektojnë këtë marrëveshje dhe janë zotuar qartë për bashkëpunim afatgjatë me Turqinë në lidhje me këto çështje. Prandaj, ka ardhur koha për të përfunduar procesin e anëtarësimit dhe ratifikimin e protokollit të anëtarësimit”, shtoi ai.
Kërkesat e Ankarasë
Më herët të dielën, Suedia tha se kishte besim se Turqia do të miratonte kërkesën e saj për t’u bashkuar me NATO-n, por se ajo nuk mund të përmbushte të gjitha kushtet e kërkuara nga Ankaraja.
“Turqia konfirmon se ne bëmë atë që thamë se do të bënim, por gjithashtu thotë se dëshiron gjëra që ne nuk mund ose nuk duam t’u japim atyre,” tha kryeministri suedez Ulf Kristersson në një konferencë ushtarake në Suedi.
Finlanda dhe Suedia nënshkruan një marrëveshje trepalëshe me Turqinë vitin e kaluar që synon të kapërcejë kundërshtimet e Ankarasë ndaj anëtarësimit të tyre në NATO.
Të dy vendet aplikuan për t’u bashkuar me NATO-n pas pushtimit rus të Ukrainës, por Turqia kundërshtoi, duke i akuzuar vendet për strehimin e militantëve, duke përfshirë anëtarë të Partisë së ndaluar të Punëtorëve të Kurdistanit në Turqi.
Kërkesa e Turqisë për ekstradimin e personave që i konsideron terroristë është gjithashtu problematike.
Ankaraja shprehu zhgënjimin ndaj një vendimi të Gjykatës së Lartë Suedeze në fund të vitit të kaluar që pezulloi një kërkesë për ekstradimin e një gazetari që dyshohet se ishte i lidhur me klerikun Fetullah Gulen, të cilin Turqia e konsideron përgjegjës për përpjekjen për grusht shtet. /tesheshi.com/
