Gjykata e Lartë suedeze hodhi poshtë sot kërkesën e Ankarasë për ekstradimin e gazetarit Bulent Kenes në Turqi, të cilën presidenti turk Rexhep Tajip Erdogan e ka vendosur si kusht për të miratuar pranimin e Suedisë në NATO.
Gjykata e Lartë vendosi se ka “shumë pengesa” për dëbimin e këtij gazetari, ish-drejtor redaktues i edicionit në gjuhën angleze të gazetës Zaman, duke përmendur natyrën politike të akuzave kundër tij në Turqi dhe statusin e refugjatit që ai ka kur u lejua në Suedi, ku jeton në mërgim.
Ankaraja e akuzon Kenes për përfshirje në tentativën e dështuar të grushtit të shtetit të vitit 2016 dhe për lidhje me organizatën e predikuesit Fethullah Gulen.
Kështu, drejtësia suedeze bëhet pengesë për marrëveshjen politike mes dy vendeve, ku Turqia kërkon nga Suedia ekstradimin e elementëve të cilët ajo i ka në listën e saj të zezë, si kusht për qëndrimin pro hyrjes së shtetit nordik në NATO.
Ngjashëm, kjo lloj marrëveshje është dhe mes Turqisë dhe Finlandës. /tesheshi.com/
