Vjeshtën e këtij viti do të nisë në vendin skandinav i pari kurs i përgatitjes së imamëve i financuar nga shteti. Programi njëvjeçar synon të ofrojë bazat e teologjisë islame për ata që duan ta vazhdojnë përgatitjen e tyre për t’u bërë udhëheqës shpirtërorë.
Programi përgatitor do të mund të ndiqet në Kista Folkhögskola, një institucion arsimor në kryeqytetin e Suedisë, në Stokholm.
“Do të japim mësim udhëheqjen dhe teologjinë islame. Viti i parë do të jetë vetëm një hyrje. Programi i studimit do të zgjerohet dhe thellohet në vitet pasuese,” ka shpjeguar drejtori Abdulkader Habib për një radio vendore, Sveriges Radio.
Drejtuesi i institucionit shkollor ka theksuar nevojën e madhe për diçka të tillë, teksa ka shumë që i udhëheqin bashkësitë muslimane.
“Prandaj kërkohet që të ketë njerëz të përgatitur në Suedi, që të kenë këndvështrimin suedez dhe dijen muslimane.”
Kështu, Kista Folkhögskola do të marrë përsipër mësimin e teologjisë islame me një ndihmë financiare nga shteti suedez.
“Kjo do të sigurojë stabilitet. Shumë muslimanë do ta shmangin ndjenjën se duhet ta lënë vendin dhe të udhëtojnë për në Lindjen e Mesme për t’u shkolluar,” ka shtuar Abdulkader Habib-i.
Kjo çështje është diskutuar dhe tetë vite më herët, në 2008-n, nga qeveria suedeze, por atëherë u vendos që të qëndrohej larg përgatitjes islame, sepse kjo do të nënkuptonte nëpërkëmbjen e doktrinës qeveritare të asnjanësisë fetare. /tesheshi.com/
