Presidentja e Kosovës, Vjosa Osmani, ka reaguar për heqjen e pengesës së fundit për hyrjen e Suedisë në NATO, duke renditur shtetet që sipas saj kanë radhën tashmë për të qenë pjesë e Aleancës Euroatlantike.
Pasi sekretari i përgjithshëm i NATO-s Jens Stoltenberg njoftoi se presidenti turk Rexhep Tajip Erdogan ka vendosur të mbështesë hyrjen e Suedisë në këtë organizatë, Vjosa Osmani ka shkruar në Twitter: “Lajm i mrekullueshëm! Në vazhdim janë Bosnja, Kosova dhe Ukraina. Kjo do ta bëjë Aleancën më të fortë dhe Evropën më të sigurt”.
Kujtojmë se Erdogan deklaroi se do të ratifikojë anëtarësimin e Suedisë në NATO. Me këtë, së shpejti ky vend duhet të bëhet anëtari i 32-të i kësaj organizate.
Kësaj lëvizjeje i parapriu njoftimi se do të mbështesë anëtarësimin vetëm nëse Bashkimi Evropian rihapë negociatat e anëtarësimit me Turqinë. Suedia, të paktën kështu thonë mediat në këtë vend, e mbështeti këtë ide. /tesheshi.com/
