Suedia dhe Danimarka pajtohen t’i heqin së shpejti kontrollet kufitare

Pas bisedimeve në Bruksel me zyrtarë nga Gjermania, Suedia dhe Danimarka, në një takim të thirrur nga komisionieri i BE-së për Migracionin, Dimitris Avramopulos, dy vendet nordike kanë rënë dakort që t’i heqin sa më shpejt të jetë e mundur kontrollet e përkohshme kufitare, por duke i vënë fre fillimisht valës së refugjatëve.

“Ramë në një mendje që t’i mbajmë (masat) në minimum, e t’i kthehemi normalitetit sa më shpejt të jetë e mundur. Të tërë ramë dakort se duhet ruajtur Shengeni dhe lëvizja e lirë,” tha Avramopulos.

Takimi u thirr pasi Danimarka nisi këtë javë kontrollet në kufirin me Gjermaninë, e pasi të njëjtën gjë bëri Suedia, duke vendosur kontrollet në kufirin me Danimarkën. Kontrollet lufitare janë parë nga të dy shtetet si një prej masave që mund ta frenojnë ardhjen e papushimtë të refugjatëve.

Ministri suedez i Emigracionit, Morgan Johansson, sqaroi se kontrollet ishin të nevojshme ngaqë vendi i tij kishte pritur më shumë azilkërkues për frymë se çdo vend tjetër i BE-së.

Ndërsa ministrja daneze e të njëjtit dikaster, Inger Stojberg, e bëri të qartë se, “nuk duam që të jemi vendmbërritja përfundimtare për mijëra e mijëra azilkërkues.” /tesheshi.com/