Një gjykatë suedeze ka dënuar me burgim të përjetshëm një ish-zyrtar iranian i cili mori pjesë në ekzekutime masive dhe torturime të të burgosurve politikë në vitet ’80.
Hamid Noury , 61 vjeç, u arrestua në aeroportin e Stokholmit në vitin 2019 dhe u akuzua për krime lufte dhe ekzekutime masive dhe tortura të të burgosurve politikë të kryera në burgun e Gohardashtit në Karaj në vitin 1988.
Noury ”në bashkëpunim me të tjerët mori pjesë në ekzekutime”, tha gjykata kur shqiptoi dënimin për “krime të rënda sipas ligjit ndërkombëtar”, raportoi Reuters.
Irani e dënoi këtë vendim.
“Irani është absolutisht i sigurt se dënimi i shqiptuar ndaj Noury-t është i motivuar politikisht dhe nuk është ligjërisht i vlefshëm”, tha zëdhënësi i Ministrisë së Punëve të Jashtme, Nasser Kanaani.
Noury ka mohuar të gjitha akuzat dhe avokati i tij ka njoftuar një apel.
“Rreth 5000 njerëz u vranë”
Amnesty International vlerëson se rreth 5,000 njerëz u ekzekutuan me urdhër të qeverisë iraniane, dhe në një raport të vitit 2018 vlerësoi se “numri aktual mund të jetë më i lartë”.
Por Irani kurrë nuk i ka pranuar vrasjet.
Noury është deri më tani personi i vetëm në gjyq për spastrimet e disidentëve politikë dhe anëtarëve të synuar të Muxhahidëve të Popullit Iranian.
Qindra iranianë në mërgim që ndoqën gjyqin e përshëndetën vendimin me shprehje kënaqësie.
Gjyqi përkeqësoi marrëdhëniet midis Suedisë dhe Iranit.
Pak para përfundimit të gjyqit, mediat iraniane raportuan se shkencëtari suedez-iranian Ahmadreza Djalali ishte dënuar me vdekje nën akuzën e spiunimit për Izraelin dhe se do të ekzekutohej.
Suedia njoftoi gjithashtu se një turist suedez përfundoi në burg në Iran. /tesheshi.com/
