Qeveria suedeze njoftoi se dëshiron të lejojë policinë të përdorë njohjen e fytyrës në kohë reale nga kamerat në vende publike për të identifikuar të dyshuarit për krime të caktuara.
Ky njoftim është pjesë e zgjerimit të legjislacionit të miratuar së fundmi nga 27 shtetet anëtare të Bashkimit Evropian për kontrollin e sistemeve të inteligjencës artificiale.
Kjo rregullore evropiane ndalon “përdorimin e identifikimit biometrik në distancë në kohë reale në vende publike”, por me përjashtime për të dyshuarit për vepra të caktuara ose në rastin e një kërcënimi terrorist.
Qeveria suedeze në dhjetor bëri thirrje për një hetim të fokusuar në zgjerimin e përdorimit të kamerave të vëzhgimit, veëanërisht në përdorimin e njohjes së fytyrës.
Suedia kërkoi këtë hetim, brenda një periudhe jashtëzakonisht të shkurtër prej gjashtë muajsh, pasi vendi duhet të bëjë përparim “të rëndësishëm” në përdorimin e kamerave në luftën kundër krimit, tha në një konferencë shtypi Ministri i Drejtësisë Gunnar Strömer.
“Njohja e fytyrës në kohë reale në vende publike duhet të lejohet në luftën kundër krimit për aq sa e lejon rregullorja e AI-së e BE-së”, tha Kazimir Aberg, i cili drejtoi hulumtimin.
Teksti evropian lejon përdorimin e njohjes së fytyrës për të parandaluar një kërcënim terrorist ose për të synuar viktimat.
Gjithashtu është i mundur identifikimi i të dyshuarve në rastet e terrorizmit, përdhunimit, sulmeve të rënda kundër njerëzve, trafikimit të qenieve njerëzore.
Aberg beson se kjo teknologji duhet të lejohet vetëm për krime të dënueshme me të paktën 4 vjet burgim dhe me lejen e një autoriteti gjyqësor.
Kjo teknologji duhet të përdoret vetëm në kuadër të veprimeve për një hetim specifik dhe jo në mënyrë proaktive, shtoi kreu i hetimit.
Ministri suedez i drejtësisë përshëndeti propozimin, të cilin ai e konsideroi gjithëpërfshirës dhe tha se qeveria do të qartësonte planin e saj, megjithatë pa dhënë një afat specifik. /tesheshi.com/
