Shqipëria, më saktë kryeminsitri Rama, ka zgjedhur të mos mbajë anë turke në qasjen ndaj Suedi-Finlandës në NATO. Ndërsa Ankaraja, një aleatë dhe një mbështetëse edhe më e ngushtë e Tiranës zyrtare nën qeverisjen e PS-së, kundërshton hyrjen e dy vendeve nordike në Aleancë, me pretendimin se mbështesin grupime terroriste me të cilat Turqia është në luftë, në qëndrimin shqiptar ky sentiment politik nuk është i pranishëm.
Kështu, gjatë një vizite në Tiranë të kryeminstres së Finlandës Sanna Marin, nga homologu i saj shqiptar u dha dakortësi e plotë për hyrjen e tyre në NATO
“Mbështesim anëtarësimin e Finlandës dhe Suedisë në NATO. Në çdo aspekt, këto dy vende janë një vlerë e shtuar e NATO. Në ditët e sotme dyert e NATO duhet të jenë të hapur për hyrjen e Finlandës dhe Suedisë. Jemi të privilegjuar që të na jepet një mundësi për të mbështetur Finlandën. I thashë kryeministres së Finlandës se nuk pres asgjë për negociata”, theksoi Rama.
Ndërsa në vlerësimet e saj për këtë qëndrim, gruaja që drejton qeverinë finlandeze iu shmang përmendjes së vetos turke, duke thënë se këtë që po ndodh(mes Tiranës dhe Helsinkit), duhet ta dëgjojë Rusia.
“Dua të falenderoj Shqipërinë për mbështetjen tuaj të qartë. Zëri juaj dërgon mesazh të rëndësishëm për Rusinë. Ne jemi të bashkuar dhe se nuk ka vend për logjikën e Rusisë. Ky do të jetë mesazhi nga samiti që do të mbahet në Madrid”, tha ajo. /tesheshi.com/
