Orë pasi Suedia e Finlanda dorëzuan në NATO kërkesën për anëtarësim, Turqia reagoi sërish me “Jo”-në e saj. Më saktë presidenti Erdogan. Ai tha se vendi i tij nuk do të pajtohet me asnjë zgjerim që mund ta bëjë Organizatën e Traktatit të Atlantikut të Veriut më pak të sigurt, ose të dëmtojë sigurinë e saj.
“Ne presim që aleatët të kuptojnë ndjeshmërinë tonë (në luftën kundër terrorizmit), të
tregojnë respekt dhe mbështetje nëse është e mundur,” tha Erdogan në një takim të grupit parlamentar të Partisë për Drejtësi dhe Zhvillim (AK) në Asamblenë e Madhe Kombëtare të Turqisë në Ankara.
Ai shtoi se Turqia është një nga vendet kryesore që mbështet aktivisht aktivitetet e NATO-s, por se kjo nuk do të thotë se “ne pa dyshim do të pajtohemi me çdo propozim”.
Ai shtoi se zgjerimi i NATO-s mund të ketë sukses vetëm nëse respektohen ndjeshmëritë e Turqisë.
“NATO është një aleancë sigurie dhe Turqia nuk do të pranojë ta bëjë atë të pasigurt. Zgjerimi i NATO-s ka kuptim për Turqinë për aq kohë sa respektohet ndjeshmëria jonë”, tha presidenti turk Erdogan.
Erdogan theksoi nevojën e Turqisë për të mbrojtur kufijtë e saj nga grupet terroriste.
“Është e papajtueshme,” tha ai, që “Suedia dhe Finlanda po kërkojnë të bashkohen me një aleancë ushtarake teksa mbështesin terroristët e PKK/YPG.
Suedia ka refuzuar të ekstradojë terroristët me kërkesë të Turqisë, por guxon të kërkojë anëtarësimin në NATO”, tha Erdogan.
Në pesë vitet e fundit, as Suedia dhe as Finlanda nuk kanë përmbushur kërkesat e Turqisë për ekstradimin e dhjetëra terroristëve.
Të premten e kaluar, presidenti turk Rexhep Tajip Erdogan tha se disa vende skandinave po veprojnë në mënyrë efektive si “stehimore” për grupet terroriste. /tesheshi.com/
