Mijëra protestues sudanezë kanë bllokuar rrugët e vendit me gurë dhe kanë djegur goma, në shenjë pakënaqësie ndaj marrjes së pushtetit në duart e ushtrisë.
Në përgjigje ndaj protestës në kryeqytetin Khartoum, ushtria përdori municion dhe la të vdekur tre protestues. Po ashtu janë dëgjuar edhe shpërthime dhe të shtëna automatike kundër protestuesve që kishin bllokuar njërin nga sheshet kryesore që gjendet pranë pozicioneve ushtarake.
Autoritetet mjekësore e konfirmojnë numrin e të vrarëve, duke shtuar se shumë nga të plagosurit janë në gjendje kritike për jetën.
Mijëra protestues po vazhdojnë të qëndrojnë në kampet e vendosura shumë pranë ushtrisë, duke bërë thirrje për kalimin e pushtetit nga ushtria tek autoritetet e tranzicionit.
Grupacioni politik SPA, i cili organizoi protestat që rrëzuan autokratin Omar Bashir, e që tani synon marrjen e pushtetit, u ka bërë protestuesve për “mosbindje civile”, në mënyrë që ta heqin qafe këshillin ushtarak.
Protesta në sheshe ka zgjatur për javë, ndërkohë që zyrtarët ushtarakë nuk kanë shprehur gatishmërinë për dorëzimin e pushtetit te qeveria tranzitore. Autokrati që sundoi për 30 vite vendin, Omar Bashir, ra nga pushteti në muajin prill, pas protestave masive të këtij lloji. /tesheshi.com/
