Pesë persona, mes të cilëve edhe dy vajza skautiste, humbën jetën dhe më shumë se 30 të tjerë u plagosën si pasojë e rrëzimit të pemëve, si pasojë e stuhive që goditën Poloninë gjatë natës.
Sipas zyrës së Ekipit të Menaxhimit të Krizave Rajonale në Gdansk, vajzat 13 dhe 14 vjeçare, u gjetën poshtë pemëve, ndërkohë që ishin në gjumë në një tendë, në kampin e ngritur në pyllin Tuchola në Poloninë e veriut.
Rreth 20 skautistë u plagosën dhe u dërguan në spitalet lokale.
Adam Klodz, kryetar i Shoqatës së skautistëve të regjionit Lodz, i tha televizionit privat Polsat se evakuimi u urdhërua menjëherë, megjithëse kushtet ishin të tmerrshme.
“Ne ishim të detyruar të hapnim rrugën me kilometra nëpër pyll, midis pemëve të rrëzuara,” tha ai.
Tre viktima të tjera gjithashtu vdiqën si rezultat i rënies së pemëve dhe 10 vetë u plagosën në incidente të veçanta në veriun e Polonisë.
Më shumë se 170,000 vetë mbetën pa energji dhe 800 ndërtesa u dëmtuan, në stuhitë që goditën kryesisht pjesën veriore dhe perëndimore të Polonisë, sipas Ekipit të Menaxhimit të Krizave Rajonale në Gdansk.
Më shumë stuhi priten gjatë fundjavës, ndërkohë që janë lëshuar edhe paralajmërime për kushte të rënda të motit në disa rajone, në kohën kur temperaturat në Poloni kanë arritur prej 35 deri në 38 gradë celsius, që për këtë vend janë të pazakonshme.
Një takim urgjent i Ekipit të Menaxhimit të Krizave të qeverisë u thirr të shtunën, dhe Kryeministri Beata Szydlo premtoi t’i ndihmonte të gjithë personave në nevojë.
Grzegorz Nowik, kreu i Shoqatës së skautistëve të Republikës së Polonisë, urdhëroi një muaj zi për organizatën. /tesheshi.com/
