Të paktën 10 njerëz kanë humbur jetën në Kosta Rika dhe Nikaragua, si pasojë e stuhisë tropikale ‘Nate’, e cila tani i është drejtuar brigjeve jugore të SHBA-ve.
Në të dy vendet e Amerikës Qendrore është deklaruar gjendje e jashtëzakonshme dhe raportohen mbi 15 njerëz të humbur.
Stuhia ‘Nate’ ka shkaktuar reshje të forta, rrëshqitje të dheut dhe përmbytje që po bllokojnë rrugët, duke shkatërruar urat dhe dëmtuar shtëpitë.
Në Kosta Rika, gati 400 mijë njerëz janë pa ujë dhe mijëra po flenë në qendra strehimi, tha Komisioni Kombëtar i Emergjencave.
Në Kosta Rika, të gjitha udhëtimet me tren u pezulluan dhe dhjetëra fluturime u anuluan, gjatë ditës së enjte, ndërsa janë mbyllur edhe parqe kombëtare të njohura për turistët.
Stuhia gjithashtu shkaktoi dëme të mëdha edhe në infrastrukturën në Nikaragua. /tesheshi.com/
