Një stuhi e madhe rëre ka përfshirë pjesën perëndimore të Lindjes së Mesme, duke bërë që me dhjetëra njerëz të përfundojnë në spital, ndërsa autoritetet e shëndetit publik kanë dhënë alarmin.
Pasi zbriti në pjesë të Sirisë, të hënën, pluhuri është shpërndarë tashmë në zona më të gjera.
Pjesë të Libanit, Izraelit, Turqisë dhe Qipros po vuajnë gjithshtu pasojat e stuhisë. Agjencia shtetërore e lajmeve në Liban njoftoi se një grua humbi jetën për shkak të stuhisë së rërës në veri të vendit.
Media siriane njoftoi se kushtet e motit ndaluan luftimet në Hama dhe në Idlib. Gazeta al-Watan tha se helikopterët qeveritarë nuk mundën të ngriheshin për shkak të pluhurit që ka reduktuar shikueshmërinë.
Moti i “pluhurosur” vjen kryesisht për shkak të një sistemi të presionit të ulët që ka përfshirë rajonin dhe rërës që ngrihet nga lindja.
Banorët kanë marrë masat e tyre duke vendosur maska në fytyrë në rastet kur kanë qenë të detyruar të dalin nga shtëpitë.
Stuhia e rërës është fotografuar në kryeqytetin e Libanit, Bejrut por edhe në kampet e refugjatëve sirianë në këtë vend.
Të paktën 80 persona janë dërguar në spital me problem të frymëmarrjes, ndërsa autoritetet këshilluan njerëzit me probleme shëndetësore të qëndrojnë brenda shtëpive. /tesheshi.com/
