Heqja e menjëhershme e një muraleje të vendosur pranë qendrës së biznesit të Sidneit është kërkuar nga ambasadori ukrainas në Australi, i cili kritikoi krijuesin e saj se “nuk kishte asnjë ide për pushtimin rus të vendit të tij” dhe e përshkroi veprën si “absolutisht ofenduese” për të gjithë ukrainasit.
Muralja e madhe e krijuar nga Peter Seaton përshkruan një ushtar rus dhe ukrainas të përqafuar.
Sipas diplomatit ukrainas Vasyl Myrosichenko, ky projekt “krijon një ndjenjë të rreme barazie midis viktimës dhe agresorit”. “Ajo duhet të hiqet pa vonesë”, shkroi ambasadori në Australi.
Sociologia Olga Boychak, një pedagoge në kulturat dixhitale në Universitetin e Sidneit, e përshkroi këtë ekuacion si të rrezikshëm sepse “nënkupton se paqja mund të arrihet nëse të dyja palët bien dakord të dorëzojnë armët”.
“Tani të gjithë kanë një pamje të qartë se çfarë do të ndodhte nëse Ukraina pushonte së luftuari, kështu që ky ‘art’ delegjitimon përvojat e rezistencës”, vuri në dukje ajo në postimin e saj.
Sipas saj, muralet përkatëse në Rusi shprehin një rrëfim të ngjashëm, duke përfshirë viktimën dhe sulmuesin në kushte të barabarta në një imazh. “Nëse je një artist dhe i interesuar të kontribuosh në vizionin e paqes, një vend i mirë për të filluar është të lexosh për historinë post-koloniale të Ukrainës.”
Artisti kërkoi falje për punën e tij dje, të dielën, duke sqaruar se në asnjë mënyrë nuk është i lidhur me organizatat ruse, siç e kanë akuzuar kritikët e tij.
“U kërkoj falje nga zemra ukrainasve të cilët i ofendova. Nuk ishte ky qëllimi im. Qëllimi im ishte të promovoja paqen”, tha Seaton në një postim në Instagram, duke shpjeguar se ai beson fuqimisht se të gjithë njerëzit në planet janë një dhe duhet të jenë të bashkuar.
“Nëse doni të më urreni për këtë, ndjehuni të lirë, por derisa të arrij në varr do të vazhdoj të mbështes këtë ideal, se ka më shumë gjëra që na bashkojnë sesa ato që na ndajnë”, shtoi artisti. /tesheshi.com/
