Një stuhi e jashtëzakonshme e ka përfshirë Shkodrën, aty ku po luhej ndeshja midis Shqipërisë dhe Maqedonisë, e vlefshme për eliminatoret e Botërorit të 2018-tës.
Gjyqtari i takimit, turku Hysejin Gëkçek, është detyruar ta ndërpresë ndeshjen në minutën e 75-të, pasi ka qenë e pamundur që të luhej futboll nga shiu i dendur dhe era e fortë.
“Loro Boriçi” është boshatisur plotësisht, e nuk dihet nëse minuat e mbetura do të luhen sonte. Rreshjet vijojnë të jenë të furishme.
Rezultati i ndeshjes është 1-1.
Shqipëria ka mbizotëruar plotësisht në pjesën e parë, duke e gjetur golin në minutën e 9-të me anë të Armando Sadikut.
Pjesa e dytë ka qenë e errët për kuqezinjtë që në fillim, me një pështjellim të pashpjegueshëm mes lojtarëve. Nga kjo kanë përfituar maqedonasit, që kanë barazuar në minutën e 51-të. Alioski ka shënuar pas një pasimi të gabuar të lojtarëve të përfaqësueses sonë.
Vazhdimi nuk ka qenë premtues për kuqezinjtë, që nuk kanë arritur të reagojnë edhe pas zëvendësimeve. /tesheshi.com/
