Sipas një akademiku, fëmijët “lindin me besim” te Zoti e nuk e marrin atë thjeshtë me anë të indoktrinimit fetar.
Dr. Justin Barret, një studiues i Qendrës për Antropologji dhe Intelekt pranë Universitetit të Oksfordit, pohon se të rinjtë janë të prirur të besojnë në një Qenie Supreme, pasi ata e pranojnë si të mirëqenë se çdo gjë në këtë botë është krijuar me një qëllim.
Ai thotë se fëmijët e vegjël kanë besim edhe kur nuk ua mëson njeri në familje apo shkollë. Ai argumenton se edhe po të rriten vetëm në shkretëtirë ata do të besonin në Zot.
“Shumica e provave shkencore të 10 viteve të fundit kanë treguar se ambienti natyror ndikon në mendjen e fëmijëve më shumë se sa ishte menduar, përfshirë këtu prirjen për ta parë botën natyrore si të projektuar me një qëllim dhe se pas këtij qëllimi qëndron një Qenie inteligjente,” tha ai për programin Today të BBC Radio 4.
“Po të linim një grup fëmijësh në një ishull të rriteshin vetë, mendoj se do të besonin në Zot.”
Gjatë një fjalimit që do të mbajë ditën e martë në Institutin Faraday në Universitetin e Kembrixhit, Dr. Barret do të citojë eksperimente psikologjike të kryera me fëmijët, të cilat, thotë ai, do të tregojnë besimin e tyre instiktiv [të natyrshëm] se pothuajse çdo gjë është projektuar me një qëllim të caktuar.
Gjatë një studimi të kryer me fëmijë të moshave nga gjashtë deri në shtatë vjeç, ata u pyetën pse ekzistonte zogu i parë? Ata u përgjigjen: “për të bërë muzikë të këndshme” dhe “për ta bërë botën më të bukur.”
Një eksperiment tjetër me fëmijë 12-muajshë tregoi se ata ishin të habitur nga një film ku një top rrotullues krijoi një pirg blloqesh nga një grumbull i çrregullt.
Dr. Barret thotë se ka prova që tregojnë se edhe në moshën katër vjeç fëmijët e kuptojnë se pavarësisht se disa objekte janë bërë nga njeriu, bota natyrore është ndryshe.
Ai shtoi se kjo do të thotë se fëmijët janë më të prirur të besojnë në krijim se sa në evolucion, pavarësisht se çfarë u është thënë nga prindërit apo mësuesit e tyre.
Dr. Barret pohon se antropologët kanë zbuluar se në disa kultura fëmijët besojnë në Zot edhe kur nuk u flitet rreth mësimeve fetare.
“Fëmijët e zhvillojnë në mënyrë të natyrshme në mendjen e tyre prirjen për të besuar në një krijim dhe projekt hyjnor. Në kontrast me këtë, evolucioni është diçka e panatyrshme për mendjen njerëzore; relativisht i vështirë për t’u besuar.”
Marrë nga: The Telegraph – /tesheshi.com/
