Nëse njerëzit do të përshtasnin për veten e tyre një dietë vegjetariane, madje edhe nëse ulnin konsumin e mishit pa e hequr fare atë, do të kishte 8 milionë vdekje më pak deri në vitin 2050. Ky është përfundimi i një studimit për modifikimin e sjelljes ushqimore tek njerëzit, kryer nga një grup kërkuesish në universitetin e Oksfordit, e që nxjerr në pah rëndësinë e një përshtatjeje më të madh ndaj dietës vegjetariane.
Por nëse dieta kufizohet në rregulla strikte të konsumimit vetëm të perimeve e frutave, do të shmangeshin miliona vdekje të parakohshme për çdo vit. Por edhe një ndryshim më pak radikal, do të sillte ndikim. Për shembull nëse do të kufizohej përdorimi i mishit të kuq me 300 gramë në javë, kjo do të kishte ndikimin lehtësues duke shmangur 5 milionë vdekje të parakohshme.
Vlerësimi ka dalë nga studimet e universitetit të Oksfordit, ku llogariten edhe kursimet, në terma ekonomikë nëse një gjë e tillë do të arrihej vërtet.
Janë katër skenarë të ndryshëm që janë llogaritur nga kërkuesit, një prej të cilëve bazohet mbi tendencën aktuale të konsumimit në një dietë, tjetri kur kufiri i konsumit të mishit zbret në 300 gramë në javë duke rritur sasinë e frutave dhe perimeve, tjetri për një dietë strikte vegjetariane dhe skenari i katërt rasti i një vegani, që nuk konsumon as mish e as produkte bulmeti.
Avantazhet më të mëdha dhe përfitimet më të mëdha në drejtim të shpëtimit të jetës, sidomos sa i takon sëmundjeve kardiovaskulare, por edhe tumoreve dhe patologjive të lidhura me obezitetin, merren nga dieta pa mish e pa bulmet, ndjekur nga ajo vegjetariane (7.4 milionë jetë të kursyera). Këto dy lloj dietash lejojnë edhe një përmirësim në reduktimin e ndotjes me 63 për qind për dietën vegjetariane.
Përfitimet ekonomike për sistemin shëndetësor do të arrinin nga 700 në 1000 miliardë dollarë në vit.
“Dietat e paekuilibruara, me një konsum të tepruar të mishit janë përgjegjëse për peshën kryesore në shkallë botërore sa i takon vdekjeve të parakohshme apo problemeve shëndetësore”, pohojnë autorët e studimit. Në të njëjtën kohë, sistemi ushqimot është përgjegjës për një të katërtën e ndotjes së mjedisit, dhe është një nga forcat kryesore që nxisin ndryshimet klimaterike.
Përgatiti: Juli Prifti – /tesheshi.com/
