Në bazë të një sondazhi të organizuar nga Good Country Index, nga 162 vende të botës, Suedia është zgjedhur vendi “më i mirë” në botë, në kuptim të vënies shtetit në shërbim të interesave të qytetarëve të saj, dhe në kuptim të dëmit më të vogël të shkaktuar popujve dhe vendeve tjera, si dhe ambientit në përgjithësi.
Suedia shënon më së tepërmi pikë në kontributin e vet për një jetë më pozitive, përfshirë këtu prosperitetin, shëndetin dhe mirëqenien e qytetarëve, si dhe performancën e mirë kulturore.
Islanda, në anën tjetër kryeson listën për kontribut dhënë planetit dhe mbrojtjes klimaterike, përfshirë emetimin e ulët të CO2-së dhe prodhimin minimal të materialeve të dëmshme; derisa Britania e Madhe në këtë fushë qëndron në vendin e 22-të.
Megjithatë, Britania e Madhe kryeson listën kur bëhet fjalë për shkencën dhe teknologjinë, duke marrë parasysh numrin e publikimeve dhe studimeve shkencore, për shpikje dhe për çmimet e fituara Nobel.
Raporti, i cili peshon kontributin e secilit vend për planetin tonë dhe racën njerëzore, është ide e këshilltarit politik Simon Anholt.
Qëllimi i tij është të gjenden mënyra se si të inkurajohen vendet për të bashkëpunuar më tepër dhe për të garuar më pak.
“Vend i mirë është ai i cili kontribuon në mënyrë të suksesshme për të mirën e njerëzimit, sigurisht që duhet t’i shërbejë interesit të popullit të vet, por kurrë në dëm të popujve tjerë apo resurseve natyrore të tyre: ky është ligji i ri i mbijetesës njerëzore,” ka thënë ai.
Ai shtoi se Britania e Madhe duhet të bashkëpunojë dhe bashkëveprojë më shumë me vendet tjera: “Ajo nuk është një ishull që ka shkëputur lidhjet me Evropën apo me pjesën tjetër të botës. Si çdo vend tjetër i botës, edhe ajo është pjesë e sistemit. Nëse ajo dështon, gjithë ne do të dështojmë”.
Me gjithë shtimin e 38 shteteve që nga edicioni i parë i indeksit, edhe këtë herë Libia është renditur e fundit. /tesheshi.com/
