Çiftet mund të jenë shumë më mirë nëse jetojnë në gjendjen “tradicionale” të familjes ku gratë bëjnë të gjitha punët e shtëpisë, kjo nëse duan të qëndrojnë së bashku. Të paktën këtë sugjeron një raport nga Oslo dhe Kolegji universitar Akershus për Shkenca të Aplikuara.
Kërkuesit norvegjezë ishin të interesuar të zbulonin sesi gratë dhe burrat e martuar ose në bashkëjetesë ndanin punët e shtëpisë dhe përkujdesjen për fëmijët, gjatë fazave të ndryshme të jetës. Ata punuan në dy studime të ndara që përfshinë rreth 20 mijë burra dhe gra të moshës nga 18 deri në 79 vjeç duke realizuar: studimin e rrugës së jetës, brezave dhe gjinisë, si dhe studtimin e rrugës norvegjeze të jetës, moshës dhe brezave. Pjesëmarrësit iu përgjigjën respektivisht pyetjeve për ndarjen e punëve të shtëpisë dhe kujdesit për fëmijët, qëndrimine tyre ndaj barazisë gjinore dhe pyetje të tjera si fazat e jetës apo klasa sociale.
Rezultatet treguan se 65 për qind e çifteve ndanin në barazi apo afërsisht baraz, kujdesin për fëmijët, por jo punët e shtëpisë: gratë raportuan se bënin të gjithë ose pothuajse të gjithë punën në 11 për qind të çifteve dhe “diçka më shumë” në 60 për qind të çifteve. Rreth 25 për qind të çifteve i ndanin punët me më shumë barazi, ku çiftet e reja, ato pa fëmijë dhe çiftet ku gruaja ishte e punësuar me kohë të plotë ishin ata me më shumë gjasa për të ndarë së bashku në çift detyrat shtëpiake.
Kërkuesit nuk gjetën lidhje midis ndarjes tradicionale të punëve të shtëpisë (ku gratë bëjnë pjesën më të madhe të punës) dhe rrezikut më të vogël për divorc, por ata gjetën se çiftet jotradicionalë kishin më shumë gjasa të divorcoheshin sesa çiftet ku gratë bënin pjesën më të madhe të punëve të shtëpisë përgjatë një periudhe prej katër vjetësh.
“Sa më shumë një burrë punon në shtëpi, aq më i lartë është shkalla e divorceve”, thotë Thomas Hansen, bashkëautor i studimit të titulluar “Barazia gjinore në shtëpi”, referuar nga AFP. Ndërsa kërkuesit nuk gjetën fare ose pak të dhëna shkak-efekt, ata besojnë se vëzhgimi në fjalë mund të jetë për shkak të sjelleve “moderne”.
Mund të qëndrojnë si argument se çiftet tradicionalë “kanë një vlerësim shumë më të lartë për martesën dhe një qëndrim shumë më tradicional ndaj divorcit”, ndërsa çiftet jotradicionalë “mund të kenë një pikëpamje moderne më pak tradicionale për martesën, e ndaj edhe pakënaqësia e burrave mund të sjellë lehtësisht në një prishje të familjes”, sipas raportit.
“Çiftet modern janë të tillë në të dyja qëndrimet, si në ndarjen e punëve shtëpiake ashtu edhe në perceptimin e tyre për martesën, duke i konsideruar më pak të shenjta”, thotë Hansen, duke nënvizuar se studimi mbi të gjitha bën fjalë për vlerat. “Në këta çifte modernë, gratë gjithashtu kanë një nivel më të lartë arsimimi dhe punë të mirëpaguara, që i bën më pak të varura financiarisht nga burrat. Ato mund ta menaxhojnë shumë më lehtë nëse divorcohen”.
Kërkuesit thonë se ndarja e barabartë e përgjegjësive për punët shtëpiake nuk kontribuon domosdoshmërisht në një marrëdhënie po aq të drejtë mes të martuarve dhe mungesa e barazisë në shtëpi dhe cilësia e jetës janë të habitshme. “Të gjithë do të mendonin se ndarjet ndodhin më shpesh në familjet me më pak barazi në shtëpi, por statistikat tona tregojnë të kundërtën”, thotë Hansen.
Sipas tij, shoqërimi i të dhënave mund të jetë për shkak se çiftet janë më të lumtura kur kanë role të mirëpërcaktuara në marrëdhënien e tyre sesa njerëzit që i shkelin këmbën njëri-tjetrit. “Mund të jetë që ka më pak grindje, duke qenë se mund të grindesh shumë më shpejt nëse të dy palët kanë të njëjtat role, dhe dikush ka ndjesinë se tjetri po tërheq më shumë nga vetja”, shton ai.
Rezultatet e sondazhit më të fundit duket se janë në kontradiktë me një studim më të fundit të ndërmarrë nga kërkuesit në universitetin e Kembrixhit sipas të cilit burrat ishin më të lumtur kur ndanin detyrat shtëpiake me gratë.
Studimi i Kembrixhit ishte bazuar në të dhëna të mëparshme të mbledhura nga 30 mijë njerëz në 34 vende. Kërkuesit gjetën se burrat kishin përfituar më shumë, sa më shumë të kishin kontribuar në punët e shtëpisë, por studiuesit thanë se kjo mund të ishte e lidhur edhe me faktin se ata mund të preferonin një jetë të qetë duke bërë punë shtëpie sesa duke pasur në krah “gjysmën tjetër” tërë nerva.
Përgatiti: Juli Prifti- /tesheshi.com/
