Studimi, në të cilin janë përfshirë 2.000 burra dhe gra tregoi se 121 njerëz të cilët kanë vdekur nga sëmundjet e zemrës, kanë parë botën më të “errët” se sa njerëzit tjerë.
Optimizmi nuk do t’ju bëjë më të shëndetshëm dhe nuk do t’ju zgjasë jetën, por optimizmi nuk do të shkaktojë problemet shëndetësore të cilat i shkakton pesimizmi.
Studimi finlandez është i pari në botë që ka hetuar lidhjen në mes të vdekshmërisë nga sëmundjet e zemrës dhe pesimizmit.
“Pesimizmi në kombinim me diabetin, hipertensionin apo pirjen e duhanit mund të jetë një kombinim katastrofik që shkakton vdekjen. Tiparet e personalitetit tuaj mund të kenë ndikim negativ në shëndetin fizik”, ka thënë autori kryesor, Dr. Mikko Pänkäläinen, një psikiatër në Spitalin Qendrore Päijät-Hame në Lahti, Finlandë. “Nëse ju jeni pesimist dhe keni ndonjë problem shëndetësor, atëherë është edhe më e rëndësishme që ju të kujdeseni për shëndetin tuaj fizik.”
Hulumtuesit kanë shqyrtuar të dhënat e mbledhura në vitin 2002 si pjesë e një studimi mbi plakjen, të cilat përfshinë 2,267 burra dhe gra të moshës mes 52 dhe 76 vjet. Të dhënat janë mbledhur mbi statusin socio-ekonomik, mënyrën e jetesës, niveli i sheqerit në gjak, tensioni i gjakut dhe sëmundjet. Pastaj përmes pyetësorit, respektivisht reagimin në tri deklarata optimiste apo pesimiste, është vlerësuar niveli i optimizmit dhe pesimizmit.
Një prej deklaratave optimiste ka qenë: “Në kohë të pasigurta, zakonisht shpresoj në më të mirën.” Shembull i një deklaratë pesimiste ishte: “Nëse diçka mund të shkojë keq kur bëhet fjalë për mua, kjo edhe do të ndodhë.” Pjesëmarrësit është dashur të tregojnë se në çfarë mase ata e identifikojnë veten me çdo deklaratë në një shkallë nga zero (fare nuk pajtohem) deri në katër (pranoj). Studiuesit thanë se gjatë observimit 11-vjeçar të të sëmurëve nga zemra, kanë vdekur 121 persona prej të cilëve më shumë ishin pesimistë në raport me njerëzit që janë ende gjallë.
Njerëzit të cilët ishin “pesimistë” në grup, kishin rrezik 2.2 herë më të lartë të vdekjes nga sëmundjet e zemrës. Studiuesit theksojnë se studimi tregon se pesimizmi nuk është i mirë për shëndetin./tesheshi.com/
