Bazuar në rezultatet e një studimi të ri të publikuar muajin e kaluar në revistën Journal of Food Composition and Analysis, frutat dhe perimet e ngrira në shumë raste janë më ushqyese, ngase frutat e freskëta humbin vitaminat kur qëndrojnë një kohë më gjatë në frigorifer.
Për nevojat e këtij studimi, autorët kanë përcjellë se sa shpesh njerëzit blejnë dhe hanë fruta e perime dhe për më shumë se dy vjet kanë matur përmbajtjen ushqyese të tre llojeve të produkteve: të freskëta, të ngrira dhe të ruajtura (fruta të freskëta dhe perime që janë lënë në frigorifer për disa ditë). Hulumtimet i kanë kryer në brokoli, lulelakër, misër, bishtaja, bizele, spinaq, boronica dhe luleshtrydhe.
Hulumtuesit kanë krahasuar përqendrimet e tre materieve kyçe ushqyese në fruta dhe perime: vitamina C, vitamina A dhe folate. Këto materie janë të tretshme në ujë dhe të ndjeshme ndaj ngrohjes, prandaj edhe janë më lehtë për t’i studiuar. Në testet e kryera, frutat dhe perimet e ngrira ua kanë tejkaluar frutave dhe perimeve të freskëta të ruajtura.
“Rezultatet e këtij studimi nuk e mbështesin bindjen e krijuar të konsumatorëve që ushqimet e freskëta kanë një vlerë më të lartë të materieve ushqyese sesa ato të ngrira”, shkruajnë autorët.
Produktet e freskëta zakonisht përmbajnë më së shumti materie ushqyese gjatë sezonit të të korrave, megjithatë, këto materie ushqyese fillojnë të degradojnë në momentin kur fillojnë të mblidhen frutat ose perimet, apo kur ato paketohen dhe hidhen në treg. Kur i blejmë dhe i sjellim ato në shtëpi, shumë prej këtyre materieve ushqyese fillojnë të bijnë në nivelin më të ulët sesa në produktet e ngrira të cilat janë ngrirë menjeherë pas mbledhjes së tyre.
Megjithatë, në shumicën e rasteve, përmbajtja e produkteve ushqimore të freskëta dhe të ngrira është aq i ngjashëm se kjo nuk do të paraqesë ndonjë ndryshim të rëndësishëm për shëndetin, sepse është më e rëndësishme sasia sesa forma që është marrë në organizëm. /tesheshi.com/
