“Problemet nuk janë me njerëzit, mendoj se politika dhe politikanët i kanë bërë ato shumë të mëdha. Shpresoj që në të ardhmen do të kemi më shumë bashkëpunim midis rinisë shqiptare dhe serbe”, thotë Milena Beran, studiuese e Gjuhës dhe Letërsisë Shqipe në Beograd.
Milena, e cila po qëndron për herë të dytë në Prishtinë, në Seminarin Ndërkombëtar për Gjuhën, Letërsinë dhe Kulturën Shqiptare thotë se qëndrimi i parë i saj në Kosovë, pas konfliktit ishte pak me ankth.
“Nuk isha kaq e lirë sa jam sot sepse nuk e dija çfarë do të bëhet dhe si janë njerëzit këtu, sepse dua të them se edhe ne që jemi në Serbi, edhe ju që jeni në Kosovë ose në Shqipëri, jemi rritur me mediat që nuk flasin mirë për njëri-tjetrin.
Për shembull, imazhi i shqiptarëve në Serbi nuk është i mirë dhe ai i serbëve në Kosovë ose në Shqipëri nuk është i mirë dhe kisha frikë. Kisha pak frikë dhe familja ime kishte frikë, po tani është shumë mirë nuk kam pasur dhe nuk kam asnjë problem”, thotë në një intervistë për Radio “Evropa e Lirë”.
Sipas saj nuk ka shumë diferenca të mëdha mes kulturës dhe traditës ndërmjet popujve.
“Tani interesohem shumë për kulturën dhe traditën shqiptare dhe mendoj se është një gjë interesante për mua. Dua të them se nuk jemi shumë të ndryshëm, sa besojmë se jemi të ndryshëm. Mendoj se kemi pak diferenca, por nuk jemi shumë larg nga njëri-tjetri, pra e kam fjalën për kulturën dhe traditën”, ka thënë ajo. /tesheshi.com/
