Nga Gani Gashi
Dështon operacioni i Policisë së Kosovës, inspektorëve të Agjencisë Tatimore të Kosovës ATK dhe Inspektorëve të Bankës Qendrore të Kosovës, për të kontrolluar selinë qendrore të ‘Jugobanka-s’ që është duke vepruar ilegalisht në veri të Mitrovicës, kanë njoftuar burime të portalit tesheshi.com.
Burime të portalit tesheshi.com, kanë theksuar se operacioni i Policisë së Kosovës dhe institucioneve të tjera financiare të Kosovës, që pa filluar ka qenë i dekonspiruar nga zyrtarë të policisë së Kosovës në veri të Mitrovicës.
“Për fillimin e oprecionit ka qenë i njoftuar direkt drejtori i kësaj banke ilegale, Drashko Knezheviq, si dhe strukturat paralele e kriminale serb që veprojnë në veri të Mitrovicës me mbështetjen e Beogradit”, ka thënë burimi.
“Strukturat paralele serbe kanë organizuar rreth 100 veta në veri për të penguar hyrjen e policëve dhe inspektorëve në këtë bankë, duke bërë që zyrtarë të institucioneve të Kosovës dhe të policisë të tërhiqen para turmës serbe”, ka thënë burimi i portalit tesheshi.com.
Sipas tij, në turmën e serbëve prej rreth 100 vetash, kanë qenë të përfshirë pjestarë të të ashtuquajturës ‘Mbrojtje Civile Serbe’, pjesëtarë të sigurimit fizik ‘Pit Bull’ si dhe qytetarë të tjerë, të zakonshëm.
Sipas burimeve, dyshohet se ‘Jugobanka’ që është duke vepruar në veri të Mitrovicës në mënyrë ilegale dhe palicencuar, duke kryer veprën penale të shmangies nga tatimi si dhe pastrim të parave”.
Burimi ka shtuar se Gjykata në Prishtinë ka lëshuar një urdhër-kontrolli për selinë e qendrore të ‘Jugobanka’-s që gjendet në veri të Mitrovicës në rrugën Vllada Çetkoviq, si dhe në filialin e saj po ashtu ilegal në Graçanicë, në rrugën ‘Graçaniçka 66’.
Në këto operacion tani më të dështuar kanë marrë pjesë edhe zyrtarë të Drejtorisë se Policisë së Kosovës për hetimin e krimeve ekonomike e cila ka qenë bartëse e operacionit, si dhe njësia e forensikes.
Zyrtarët institucional të Kosovës janë tërhequr nga veri, ndërsa që dhe serbët e tubuar janë shpërndarë të qetë, ka thënë burimi i portalit.
Nuk dihet se kur në të ardhmen do të kryhet një operacion i tillë për kontrollimin e kësaj banke që dyshohet edhe në blerjen e pasurive të shqiptarëve në veri të Mitrovicës për llogari të qeverisë së Beogradit.
Portali tesheshi.com, ka tentuar disa herë që të kontaktojë edhe me policinë e Kosovës në veri të Mitrovicës, por një gjë e tillë ka qenë e pa munduar pasi që zyrtarë policor nuk e kanë hapur telefonin.
Në anën tjetër, burime nga dogana e Kosovës theksojnë se ditë më parë në një makinë në pikë kufitare G1 në Jarinje të Leposaviqit gjatë kontrollit doganierët dhe policët e Kosovës kanë gjetur dhe konfiskuar 52 mijë euro në dinarë serb të padeklaruar e që ishin të destinuar për ‘Jugobanka’-n në Mitrovicë”. /tesheshi.com/
