Politikanë të lartë gjermanë kanë sugjeruar se mund t’u ofrojnë shtetësi të dyfishtë të rinjve britanikë si përpjekje për të mbajtur lidhjet e Britanisë së Madhe me Bashkimin Europian.
Zëvendëskancelari gjerman, Sigmar Gabriel tha se do të shtronte çështjen e shtetësisë së dyfishtë, gjë që zakonisht është e ndaluar në Gjermani për qytetarët jashtë BE-së, në zgjedhjet e përgjithshme të vitit të ardhshëm.
“Le t’ua ofrojmë të rinjve britanikë që jetojnë në Gjermani, Itali apo Francë kështu që ata mund të mbeten qytetarë të BE-së”, tha Gabriel në një takim në Berlin me partinë e tij të qendrës së majtë, atë social-demokrate.
“Eshtë një shenjë e mirë që rinia e Britanisë së Madhe është më e zgjuar ses elita e tyre e çuditshme politike”, vijoi Gabriel. “Për këtë arsye, ne nuk mund të ngremë urat kundër tyre. Na duhet të mendojmë tani rreth asaj që mund t’i ofrojmë brezit të ri të Britanisë”.
Partia e Gjelbër në opozitë gjithashtu, ka apeluar që Gjermania të lehtësojë marrjen e një pasaporte gjermane për britanikët që jetojnë në Gjermani.
Volker Bouffier, kryeministri i shtetit gjerman Hesse që ka për qendër kryeqytetin financiar të Gjermanisë, Frankfurtin, tha për median gjermane se “një numër i konsiderueshëm britanikësh”, aktualisht janë duke aplikuar për pasaporta gjermane.
Deklaratat vijnë në një kohë që Theresa May, kandidatja kryesore e konservatorëve për të drejtuar Britaninë në negociatat e daljes nga BE, përsëriti paralajmërimin se statusi i qytetarëve të BE-së në Britani do të ishte faktor në negociata.
“Do na duhet të shqyrtojmë çështjen e njerëzve nga BE-ja që jetojnë në Britani dhe dëshiroj të siguroj se jemi në gjendje të garantojmë jo vetëm pozicionin e tyre por edhe atë të qytetarëve britanikë në vendet e tjera anëtare, në vende të tjera të Europës. Askush domosdoshmërisht nuk qëndron përgjithmonë në një vend”.
Një sondazh britanik tregoi se një shumicë e qytetarëve britanikë kundërshtojnë fort largimin e qytetarëve të BE-së nga Britania e Madhe. Politikanët britanikë do të nxjerrin argumentin se nuk mund të garantojnë statusin e qytetarëve të BE derisa të ketë garanci të ngjashme për statusin e britanikëve që jetojnë në BE, përndryshe do të hidhnin poshtë një nga kartat domethënëse të negociatave.
Mirëpo, sidoqë të bëhen rregullat e reja të emgracionit në të ardhmen, njerëzit në të dyja anët e fushatës së referendumit bashkohen në mendimin që qytetarët e BE që jetojnë dhe punojnë në Britani, dhe qytetarët britanikë që jetojnë në Europë, nuk duhet të preken.
Kërkimet nga qendra e sondazheve “British Future” gjetën se 84 për qind e publikut britanik mbështet qëndrimin e emigrantëve nga BE – përfshirë edhe tre të katërtat e votuesve pro-largimit nga BE.
Mes konservatorëve, mbështetja për mbrojtjen e statusit të qytetarëve europianë në Britani, dhe atyre britanikë në Europë është edhe më e lartë, 85 për qind, ndërsa mbështetësit e UKIP shprehen pro me 78 për qind.
Vetëm 16 për qind e publikut mendojnë se qytetarëve europianë duhet t’u kërkohet të largohen, e se qytetarët britanikë duhet të kthehen në shtëpi, e këtu bien dakord 23 për qind e fushatuesve të Brexit dhe 15 për qind e konservatorëve.
Përgatiti: Juli Prifti – /tesheshi.com/
