Kandidatja demokrate, Hillary Clinton ka provuar një përpjekje të re për të përdorur fjalët e Donald Trump kundër tij, ndërsa si ajo, si kandidati rival i demokratëve, Bernie Sanders përshtatën kursin e fushatës tashmë që gara po shkon drejt fundit brenda kampeve.
Ndërsa Clinton u përpoq të vinte në skenë një përballje të zgjedhjeve presidenciale me Trump, përpara nëntorit, Sanders ftoi demokratët të kenë një pikëpamje më të gjerë për rolin e tij në garë sesa thjesht një kandidat, duke i thënë CNN-it se ai kishte dalë në skenë për “të rivitalizuar demokracinë amerikane”.
“Na duhet të përfshijmë njerëzit. Dhe nuk është e lehtë, pasi kaq shumë njerëz kanë hequr dorë nga procesi politik, përfshirë edhe një numër të madh njerëzish që kanë të ardhura të ulëta”, tha ai. “Detyra jonë është të sjellim njerëzit pranë procesit politik”.
Sanders u zotua të luftojë përmes votimeve të fundit në qershor dhe parashikoi një fitore të demokratëve në nëntor.
“Ajo që është e mirë për Amerikën, ajo që është e mirë për partinë Demokratike, është të shohim shumë njerëz që debatojnë çështjet reale që ndikojnë vendin tonë”, tha senatori i Vermontit. “Kjo është mënyra që të kemi një pjesëmarrje të madhe të votuesve. Dhe kur ke një pjesëmarrje të gjerë të votuesve, demokratët dhe progresistët fitojnë, dhe republikanët do të humbin”.
Ai e bëri të qartë se aspiratat e tij shtrihen përtej garës paraprake, në një tjetër intervistë në CBS. “Ne mund të ndryshojmë dinamikat e politikës amerikane. Kështu, nuk janë në lojë vetëm interesat e parasë së madhe që ndihmojnë në zgjedhjen e kandidatëve”.
Duke cituar mbështetjen e madhe që gëzon mes të rinjve, senatori pretendoi për një mantel shumë më të gjerë sesa një nominim nga demokratët. “Ne jemi e ardhmja e partisë Demokratike”, tha ai.
Por, ndërsa Sanders e përshkruan fushëbetejën e ardhshme të presidencialeve të nëntorit, Clinton tashmë ka dalë në këtë fushëbetejë.
Me anë të një videoje të publikuar nga ekipi i fushatës, ajo ka përmbledhur disa nga gjërat më kundërthënëse që Trump ka thënë në 10 muajt e kandidimit për president, duke nisur me përshkrimin e meksikanëve si përdhunues dhe duke përfunduar me mburrjen e tij se ai do të mund të “qëndronte në mes të “5th Avenue” e të qëllonte një njeri” e të mos humbte asnjë votë.
“Donald Trump dëshiron që ju të harroni gjiothçka ka thënë”, paralajmëron videoja. “Mos!”. Clinton ishte edhe më e vendosur ndërsa shkruan në rrjetet sociale : “A mendon Trump se mund të na bëjë të gjithëve budallenj që të harrojmë retorikën e tij të urrejtjes? E trishtueshme!”.
Një person i afërt me Trump u tha zyrtarëve republikanë javëne kaluar se kandidati ishte gati të shndërronte personazhin e tij dhe se “pjesa që ai po luan ka ndryshuar”. Këto komente të publikuara nga Associated Press” u përgënjeshtruan prej zyrtarit që shpjegoi se ajo që donte të thoshte ishte të siguronte partinë që Trump mund të përshtatet me kontekstin e një tubimi fushate apo një fjalimi politik.
Trump prej kohësh e ka paralajmëruar një përballje me Clinton duke parashikuar në një tubim në Pensilvani se “do ta mposhtim atë keq”. Edhe Sanders duket se është pajtuar me këtë skenar të nëntorit, vetëm se mendon se rruga e fitores u takon demokratëve.
Sanders është në presion për të njoftuar strategjinë e daljes nga gara. Atij i duhet të marrë 59 për qind të delegatëve të mbetur për të pasur shumicën , sipas një analize të NBC-së. Dy sondazhe të reja tregojnë se Clinton ka një përparësi dyshifrore në Pensilvani, ku votohet të martën.
Në disktutimin për të ardhmen e Sanders, vetë Clinton ka shkuar aq larg sa të kujtojë tërheqjen e saj nga gara në vitin 2008, kur konkurronte përballë Barack Obamës. “Njerëzit e kujtojnë se presidenti Obama dhe unë kishim një garë të ashpër përgjatë gjithë pjesës së parë së fushatës dhe ai e mbaroi garën me më shumë delegatë”.
Përgatiti: Juli Prifti – /tesheshi.com/
