Kontakte me qytetarët dhe takime të përjavshme, duke përfshirë edhe dëgjesa publike me të gjitha kategoritë. Kjo do të jetë strategjia e re që do të përdorë Partia Demokratike duke nisur nga shtatori, ndërsa në çdo 1 muaj do të raportohet mbi takimet që do të zhvillohen qoftë nga deputetët ashtu edhe nga drejtuesit e degëve të PD-së.
Tesheshi.com ka mësuar nga burime pranë Partisë Demokratike se në mbledhjet e zhvilluara me Grupin e ri Parlamentar dhe me kryetarët e degëve të PD-së, kreu demokrat Lulzim Basha ka kërkuar një qasje të re të strukturave të partisë më të madhe opozitare në raport me qytetarët.
Mësohet se kreu demokrat ka udhëzuar deputetët dhe drejtuesit e degëve të PD-së që çdo muaj të organizojnë dëgjesa me qytetarët, ndërsa problematikat do të raportohen në Departamentet pranë kësaj partie, sikundër do të shërbejnë si një denoncim ndaj Qeverisë me nisjen e sesionit të ri parlamentar.
Burimet nga PD theksojnë se përmes kësaj strategjie do të synohet që deputetët dhe strukturat vendore të partisë më të madhe të opozitës të jenë sa më pranë qytetarëve, duke vendosur në këtë mënyrë një raport të ri, dhe jo sikundër ka ndodhur deri më tani, që ligjvënësit apo strukturat e partisë më të madhe të opozitës angazhoheshin në prag të zgjedhjeve apo fushatave elektorale.
“Do të ketë një koordinim mes deputetëve, kryetarëve të degëve, të deleguarve nga qendra, në mënyrë që të gjitha zonat të jenë të mbuluara dhe kontaktet me qytetarët të jenë të vazhdueshme.
Do të organizohen dëgjesa publike me grupet e interesit në mënyrë qëtë mblidhen propozime konkrete që do të përkthehen në amendamente ligjore që do të paraqiten në Kuvend.
Po kështu do të mblidhen fakte dhe prova për të denoncuar çdo zyrtar që nuk i përgjigjet qytetarëve apo nuk është në shërbim të tyre”, shprehen burime nga PD.
Një tjetër angazhim do të jetë ai i takimeve derë më derë, duke kontaktuar bizneset, kryesisht të vogla, por edhe qytetarët, ndërsa të gjitha materialet që do të mblidhen do të referohen në selinë qendrore të PD nga ku edhe do të përpunohen të dhënat. /tesheshi.com/
