Mensur Krasniqi
Pas takimit me përfaqësuesit e koalicionit “Rilindje me BESË” dhe “Aleancës për Shqipëtarët”, presidenti i shtetit Gjorgje Ivanov ka takuar edhe kreun e BDI-së, Ali Ahmeti.
Kujtojmë se BDI në krye me Ali Ahmetin i bojkotuan zgjedhjet e fundit presidenciale me ç‘rast si president u zgjodh kandidati i VMRO-DPMNE-së, Gjorgje Ivanov. Pas përzgjedhjes së Ivanov, Ahmeti thoshte se nuk e njeh si kryetar shteti Ivanovin meqë i njëjti është president i zgjedhur vetëm nga VMRO-DPMNE. Si pasojë e bojkotimit të zgjedhjeve presidenciale nga BDI, dhe në mungesë të votave nga elektorati i tyre, që me shumë gjasë do shkonin për kandidatin tjetër nga rradhët e LSDM-së, profesorin universitar, Stevo Pendarovski, meqë ky i fundit në opinion e më gjërë shquhet si mik i afërt me shqiptarët, president shteti u zgjodh Gjorgje Ivanov.
Nga ana tjetër nuk është vetëm, Ahmeti ai i cili “gëlltiti” fjalët e tij, po ashtu edhe shumica e funksionarëve të BDI-së, deklarativisht ishin kundër presidentit Ivanov, a ndërkohë pranonin takime dhe poste nga presidenti.
Në dalje nga vila e presidentit, pas takimit të sotshëm, Ahmeti tha se është biseduar se si të arrihet deri tek një shumicë e shëndoshë parlamentare, si dhe për situatën aktuale politike. Ndërsa ai partinë tij nuk e llogarit si çelësi i qeverisë dhe se të gjithë opsionet janë të hapura sepse nuk kanë asnjë përfundim nga bisedimet brenda partiake. Ai paralajmëroi se nga nesër vazhdojnë bisedimet dhe konsultimet në BDI.
“Konfirmoj para jush që ne, kemi vullnet të fortë, që të gjindet një zgjidhje për t’i futur gjërat në binar. Në interes të stablitetit të formimit të shteti. Përpara interesave tona partiake kemi vendosur interesat e qytetarëve dhe të shtetit. Të gjitha opsionet janë të hapura”, ka thënë Ahmeti.
Takimi i kreut të BDI-së, Ahmetit me presidentin Ivanov nuk ka kaluar me lehtësi tek opinion i gjërë në Maqedoni. Një numër i madh i qytetarëve, ndër to edhe opinionist të ndryshëm kanë kritikuar “hipokrizinë” e Ahmetit.
Ndërsa politikologu, Muhamed Jashari ka vënë në dukje pasojat e politikës së gabuar të Ahmetit në drejtim të mosnjohjes së presidentit të shtetit. Këtu më së shumti, sipas Jasharit kanë pësuar përfaqësuesit diplomatik shqiptar.
“Në disa shtete (9 Nëse nuk gaboj) Maqedonia duhej të kishte përfaqesues diplomatik shqiptar. i gjithë ky mospërfaqësim erdhi me pretekstin se nuk e njohim presidentin si “legjitim” dhe rrjedhimisht kuadri shqiptar në diplomaci ka vite që nuk ka mund të marrë letrat akreditive nga presidenti i shtetit. Ata që u zotuan për Integrimin Evropian, nga gjithsej 28 shtete anëtare të UE-së, vetëm në një shtet, përfaqësuesi diplomatik i rangut më lartë “Ambasador” është shqiptar.
Ja çfarë i bëri “presidenti konsesual” diplomatëve, dhe perfaqësuesve shqiptarë në diplomacinë e RM-së”, kështu ka shkruar në rrjetin social facebook, politikologu Muhamed Jashari.
/tesheshi.com/
