Tomas Strakosha “e ka vetë-ndalur” një vrull mediatik, që e dërgojnë Shqiptarin në portën e Juventusit, si pasardhës të Bufon tek bardh e zinjtë.
Mediat në Itali “ndaluan” tek emri i tij, kur Juve bëri publike një listë me 50 lojtarë që ka në vëmendje, mes të cilëve ndodhej dhe shqiptari. Në fakt disa sajte në Itali e kanë “fryrë” këtë fakt, duke u dakortësuar se portieri që po shkëlqen me Lacion në moshën 21-vjeçare, mund të jetë pasardhësi perfekt i legjendës Bufon.
Por vetë Strakosha nuk e ka lënë “të shkojë përpjetë” ky lajm, pasi është shprehur kategorik në përgjigjen e pyetjes për këtë fakt: “Nuk di gjë për interesimin e Juventusit. Natyrisht ndihem krenar që më kërkon një klub si Juve, por unë jam i lumtur tek Lacio dhe dua të qëndroj gjatë këtu” – është shprehur Tomas Strakosha.
Përgjigjja natyrisht lumturon tifozët lacialë, por në njëfarë mënyre ka mërzitur pak ata shqiptarë, sepse me një portier kuq e zi tek Juventus, krenaria “do të pasurohej” më shumë. /tesheshi.com/
