Dekada më parë, në vitet ’90 të shekullit të lënë pas, Foto Strakosha ishte një nga portierët më të njohur në Shqipëri. Dinamo, Olimpiakosi e përfaqësuesja e Shqipërisë ishin kulmet në karrierën e portierit të dalë nga provinca.
Mbrëmjen e së martës së 20 shtatorit, në takimin hapës të javës së pestë të kampionatit italian, Milan – Lacio, ka debutuar i biri i Foto Strakoshës.
Thomas Strakosha ka zhvilluar të parën ndeshje në Serinë A me Lacion, pasi portieri kryesor, Marchetti, nuk ka qenë i gatshëm fizikisht.
Milani ka fituar 2-0, por paraqitja e Strakoshës ka qenë e mirë.
“Nuk e prisja të luaja,” ka thënë 21-vjeçari, që vitin e shkuar u aktivizua te Salernitana, në Serinë B.
“Jam i lumtur për debutimin, por i zhgënjyer për rezultatin,” shton Strakosha i ri.
“Fola me familjen time para ndeshjes, dhe ata ishin të lumtur. Im atë ishte dhe më në ankth se kur luante vetë,” është rrëfyer ai pas ndeshjes për mediat e Lacios.
Thomas Strakosha u transferua te Lacio katër vite të shkuara, ndërsa la Panionisin, një skuadër e Athinës. Një sezon më parë u huazua te Salernitana, kurse me largimin e Etrit Berishës gjendet në pozitat e portierit të dytë te Lacio. /tesheshi.com/
