Nuk ka fitues në takimin e fundit të javës së 24-t të kampionatit italian. Në barazim 1-1 ka përfunduar sfida në “Olimpico” të Romës mes Lacios dhe Milanit.
Një barazim që nuk vlen për asnjë prej këtyre dy skuadrave, pasi të dyja do të vijojnë të qëndrojnë në të njëjtat pozita, Lacio në vend të gjashtë e Milan në të shtatin.
Vendasit do ta gjenin avantazhin në fund të pjesës së parë, kur Biglia do të shënonte nga pika e bardhë e 11-metërshit.
Një fitore do ta ngjiste Lacion në vend të katërt, por nuk qe e thënë që ndeshja të përfundonte ashtu. Milani do ta shtonte ritmin e presionin ndërsa loja po i afrohej fundit, për të barazuar në minutën e 85-të.
Suso bën gjithçka mirë në zonë, dhe me të majtën dërgon një top tërë finesë ngjitur me shtyllën e djathtë të portës laciale të mbrojtur nga Strakosha. Topi përfundon në rrjetë, pa mundur të devijohet nga portieri shqiptar.
Kështu Milani barazon 1-1; një rezultat i kënaqshëm në një fushë të vështirë si ajo e Lacios. /tesheshi.com/
