Sekretari i Përgjithshëm i NATO-s, Jens Stoltenberg, duke komentuar mbi operacionin “Dega e Ullirit” në Afrin, tha se Turqia është anëtari më i ekspozuar ndaj sulmeve terroriste nga të gjithë anëtarët tjerë të Aleancës .
“Turqia është anëtarja më e ekspozuar ndaj sulmeve terroriste prej gjitha vendeve tjera të NATO-s. Si çdo vend tjetër ashtu edhe Turqia, ka të drejtë të mbrohet, por është e rëndësishme që kjo të bëhet në mënyrë proporcionale dhe të moderuar”, tha Stoltenberg para gazetarëve gjatë një vizite në Madrid, ku u takua me Kryeministrin Mariano Rajoy dhe ministrin spanjoll të Mbrojtjes, Maria Dolores de Cospedal.
“Ky është mesazhi që përçoj sa herë flas me udhëheqës të vendeve të tjera, përfshirë Turqinë. Javën e kaluar bisedova edhe me Presidentin Erdogan. Ne jemi në kontakt të vazhdueshëm me vendet e tjera, përfshirë Shtetet e Bashkuara. Bëj thirrje për një kontakt të drejtpërdrejtë midis Shteteve të Bashkuara dhe Turqisë për të gjetur mënyrën më të mirë për të përmbushur sfidat në veri të Sirisë”, tha Sekretari i Përgjithshëm i NATO-s.
Ai gjithashtu preku edhe çështjen e aleancës së Spanjës dhe NATO-s, duke theksuar se Aleanca mbështet “një Spanjë të fuqishme”.
“Një Spanjë e bashkuar dhe e fuqishme është e mirë edhe për aleancën e NATO-s”, tha Stoltenberg, duke shtuar se ai nuk dëshiron të ndërhyjë në punët e brendshme të vendit.
Cospedal përsëriti angazhimin e vendit të saj në Aleancë, veçanërisht duke theksuar rëndësinë e bashkëpunimit të NATO-s dhe Bashkimit Evropian (BE).
“Kufijtë e NATO-s janë gjithashtu kufijtë e Spanjës”, tha ministri spanjoll. /tesheshi.com/
