Sekretari i Përgjithshëm i NATO-s tha të enjten se dërgimi i trupave shtesë në Kosovë nuk do të thotë se aleanca po heq dorë nga një zgjidhje e mundshme politike e konfliktit.
Stoltenberg e bëri deklaratën në prag të një takimi jozyrtar të ministrave të jashtëm të NATO-s në kryeqytetin norvegjez, Oslo.
I pyetur nëse dërgimi i 700 trupave shtesë të NATO-s në Kosovë dhe mbajtja e batalioneve në gatishmëri në rast nevoje do të thotë se aleanca pret që trazirat mund të përshkallëzohen në një konflikt më të madh në Evropë pas luftës së Rusisë në Ukrainë, Stoltenberg tha se “nuk do të thotë që NATO braktis zgjidhje politike”.
Ai shtoi se ata po dërgojnë trupa shtesë për të ndihmuar në uljen e tensioneve dhe se batalioni është në gatishmëri në rast se situata përkeqësohet.
Në komunat në veri të Kosovës të banuara kryesisht me popullatë serbe, tensionet janë rritur që nga e hëna, e cila është shndërruar në dhunë.
Serbët vendas mblidhen në protesta për të shprehur pakënaqësinë e tyre me zgjedhjen e kryetarëve të rinj shqiparë të komunave dhe kërkojnë tërheqjen e njësive speciale të policisë së Kosovës nga ndërtesat komunale.
Me këtë rast NATO ka njoftuar dërgimin e ushtarëve shtesë në Kosovë. /tesheshi.com/
