Sekretari i Përgjithshëm i NATO-s, Jens Stoltenberg, tha se forcat e NATO-s janë të gatshme të ruajnë paqen në Kosovë dhe se “nuk do të lejojnë kthimin e dhunës nga vitet 1990″.
Në një intervistë për gazetën gjermane Welt, ai i ka bërë thirrje Serbisë dhe Kosovës që t’i kthehen negociatave me ndërmjetësimin e Bashkimit Evropian, duke thënë se një rrugë e tillë është mjeti i vetëm i qëndrueshëm për të arritur paqe të qëndrueshme për të gjitha komunitetet.
“Dua ta bëj të qartë se forcat e NATO-s janë të gatshme të ruajnë paqen në Kosovë. Ne nuk do të lejojmë që dhuna e viteve 1990 të kthehet”, tha Stoltenberg.
Ai tha se NATO është e përkushtuar për ruajtjen e paqes dhe sigurisë në të gjithë rajonin dhe shtoi se është shumë e rëndësishme të investohen përpjekje shtesë diplomatike në zgjidhjen e çështjes së Kosovës.
Pas ngjarjeve në fshatin Banjskë në veri të Kosovës më 24 shtator, vendet anëtare të NATO-s e rritën numrin e anëtarëve të misionit të KFOR-it në Kosovë në gati 4500 ushtarë.
Zëvendës Sekretari i Përgjithshëm i NATO-s Mircea Geoana gjatë fjalimit të tij në konferencën e Aleancës në Budva, theksoi se komandanti i trupave të NATO-s në Kosovë është në kontakt të vazhdueshëm me të gjithë bashkëbiseduesit e tij kryesorë, përfshirë organizatat e sigurisë së Kosovës dhe kreun e forcave serbe.
Ai përsëriti se KFOR-i do të ndërmarrë të gjitha veprimet e nevojshme për të përmbushur misionin sipas rezolutës 1244 të Këshillit të Sigurimit të Kombeve të Bashkuara, konkretisht ruajtjen e një mjedisi të sigurt dhe lirinë e lëvizjes për të gjitha komunitetet në Kosovë. /tesheshi.com/
